ZPM sawrkar hnuaiah SASCI sum Vbc. 233.31 a lapse - Robert Romawia Royte

ZPM sawrkar hnuaiah SASCI sum Vbc. 233.31 a lapse.

- Robert Romawia Royte, 

Ex- Minister, MLA  & Adviser MNF 

CM dawihzep kan nei hi a vanduai thlak.

- Dr. Vanlaltanpuia, Ex- MLA & Adviser, MNF

Vawiin ni 26, April 2024 hian Chhung Inkhawm, Mizo Hnam Runah neih a ni a, he hunah hian thusawiin Pu Robert Romawia Royte, Ex- Minister, MLA  & Adviser MNF chuan, Sasci sum kum liam ta 2023-2024 chhunga vbc 700 sanction tawhah, vbc. 233.31chu a lapse a, 6oct 2023-ah first installment dawn a ni tawh a, thawk tura ruahman tawh chu ZPM sawrkarin sawrkar hmasa a dan ang thlapa contractor a thlan te a thawh tir duhloh avangin a lapse ta a ni. CM zahawm takin Assembly House-a a puan danin tun kum kal mekah hian SASCI ah Vbc. 500 hmu tur angin a insawi a, mahse a taka Mizoram allocation chu Vbc. 275 chauh a ni ta si hi a pawi takzet a, kan ram tan channa nasa tak a ni, a ti.

Thleibik neilo, mipui sawrkar din tura inzuar kha an insawi letling thawkin an khawsa ta a, VC/LC tih tura lang te an Party Unit ten an khawih ta zung zung mai a, mipui in an ning chho ṭan ta mek a, An sawrkar tirha an rikpui hlut Lengpui Airport tih ral chungchang pawh an reh leh ta a. Sawrkar enkawl kawnga an arkhawthim dai zia alo lang chho zel a ni. Kokata a Mizoram House hralh chungchang pawh nasa takin an tiri a, Mipui tana chhawrnaawm zawk turin House thar, zau zawk, sei zawk, sang zawk leh ropui zawk Salt Lake city a din tura Sawrkar hmasa inbuatsaihna an tiri tel duhlo te hi a pawi a, mipui rilru a thalo zawnga hruai kawngah ZPM sawrkar hi a taima hle a ni, a ti bawk.

Pu Roberta chuan Hripui len avanga sum hloh nasa tak kan sawi thin leh central atanga puihna kan dawn tlem zia chu amah Pu Lalduhawman Assembly House ah a rawn tichiang a. Sum hmuh tura besei atanga hmuh loh zat hi vbc 2370.80 a ni tiin zawhna a chhang a. Hei hi Budget chhung atanga hmuh tur hmuh loh chauh a ni a, Budget pawn lam atanga hmuh tur tam tak pawh hmuh loh a ni. Covid avanga puihna central atanga hmuh hi vbc 90.63 a ni, tiin House a hrilh bawk a. Oppostion an nih laia kan hmuh tamzia hahipa sawitu khan a tlem zia a takin a rawn phochhuak ta a ni, tiin, kan sawrkar laiin Ropeway leh Skywalk project atan Tourism Dept in contractor hnena pekchhuh a neihloh thu pawh a changtu Minister-in House a hrilh a ni tiin, mipui hnena thudik tawklo an thehdarh chu an mahniin an rawn tichiang zel a ni a ti bawk.

Sum enkawl thiamlo, tiin kan sawrkar an sawichhe nasa hle a, an sawrkar hnu hian kan sum hnar lian ber ṭhin GST ah 2023 aiin Feb 2024  thla khan 14% in kan sum hmuh a tlahniam nghal. March 2024 ah 29% in a tlahniam leh a, a hniam zawngin nasa takin an kal a ni. Chhungkaw sing 6 tana SEDP dawngtu tur thlanfel vek tawh, Administrative Approval bakah Expenditure sanction tih vek tawh chu an cancel vek. Mirethei chawbel an benbuak sak a, Vbc 150 an chhawm atanga vbc 110 a thlai thar lei an tum pawh vawiin thlengin pakhatmah an la lei lo a, kuthnathawktute beisawnna an thlen chho mek a ni, a ti.

Ramri hung leh FMR tihtawp chungchanga Centralin zuam chitin rengin min zuam ta hi kan CM dawihzep rah a ni chho ta zel a. Nagaland Cm huai taka thusawi ngam kan awt ru ta vawng vawng a ni. Kan sawrkar hian dawih aw pu mahse, MNF chuan huai takin kan bei zel dawn a. ZPM sawrkar chu Ram tana chhiatna tura an penna kawngah na takin kan do dawn a ni, a ti bawk.

Dr. Vanlaltanpuia, MLA & Adviser, MNF pawhin thusawiin, MNF thahrui lian ber Mizo Nationalism chu hmasawnna milin na takin kan kalpui zel dawn a, Atom bomb hmanga an ram tih tuiral ni mahse, Japanese thinlung a tuiral ve loh angin MNF chu eng anga beihna nasa karah pawh kan rilru a tuiral ve ngai dawn lova. Kan ram, kan hnam leh kan Sakhaw humhim chu kan tum bulpui ber ni rengin, Zofate rorelna pakhat hnuaia awmho hi kan tum ram, Pathian hruaina hnuaia thlen kan la tum tlat a ni, a ti.

'India in ramri hung a tum leh FMR an tih bo dawn chuan, thuneihna kan neilo,' tia, vawiina kan CM ber a ṭawng chhuak hi a pawi takzet a. CM dawihzep kan nei hi a vanduaithlak em em a ni. Kan ram, kan hnam leh kan sakhua tiboral zawnga penna reng reng chu MNF chuan kan hmelma a ni a, Nun thar, ze thar hmangin kan ram tan chona thar rilru puin, MNF thinlung dik kan pu zel a nga,  politics khawvela dingchhuak zel turin theihtawp chhuahin kan  bei zel dawn a ni, a ti bawk.

Dr. Ṭpa chuan, hmuh theih ramri na taka kan humhalh angin, kan thinlung ramri pawh nasa taka kan humhalh a ṭul chho ta zel a, kan hnam rallohna turin na takin Nationalism kan kalpui  ang. Thiamna leh finna, zirthiamna nen kan ram hian hma a sawn nan hmasawnna lo thang chho zel karah MNF tak tak, hnam, ram leh sakhaw humhim tumna fir nen hmalam kan pan zel dawn a ni, a ti.

Chhung Inkhawm hi Pu R. Lalthansanga, General Secretary, MNF in a kaihruai a, Upa J. Lalchhanhima, Adviser, MNF in hunserh a hmang a ni.

.