Aizawl | April 04, 2024: Union Home Ministry chuan Foreign Contribution Regulation Act dan hrang hrang bawh chhiat avangin India ram NGO lian 5 te FCRA licence vawiin (April 3, 2024) hian a tih tawpsak (cancelled) a ni. India ram chhunga mimal, pawlho etc ten ram dang ațanga dan hnuaia țanpuina an dawn theihna dan hi "Foreign Contribution Regulation Act, 1976" a ni.
.jpg)
April 03, 2024 a Union Home Ministry-in FCRA dan hmun tam taka bawh chhiat vanga an phalna (licence) a tih tawpsak te chu :KHIRH
1. Church of North India, Synodical Board of Social Seri ( CNI- SBSS). ennawn
2. Voluntary Health Association of India (VHAI).
3. Indo Global Social Service Society ( IGSSS).
4. Church Auxiliary for Social Action ( CASA).
5. Evangelical Fellowship of India (EFI) țhelh
Hemi hma hian kumin kum bul lamah khan Centre for Policy Research (CPR) FCRA licence pawh tih tawpsak a ni tawh bawk.
Eng nge a chhan?
Central Sorkar hian FCRA hi kum 2020 September thla khan hmun tam tak siam țhat (several amendments) a ni. He dan siam țhatna hmang NGO tam tak hmangFCRA registration chu tih tawpsak a ni, chung zingah chuan Rajiv Gandhi Foundation (RGF), Rajiv Gandhi Charitable Trust (RGCT) te pawh an tel bawk.
Kum 5 kal ta chhung khan NGO 6,600 zet FCRA Registration tih tawp ( cancelled) a ni. India ram chhunga NGO 20,693 te FCRA licence tih tawp a ni .
Parliament lehkha pawimawh kil kjawr tak The Hindu Newspaper-in a neih (data disclosed in Parliament) a tar lan dan chuan kum 2019 - 20 leh 2021-22 financial year chhungin NGO 13,520 inziak lut thar an awm.
THU BELH
FCRA chungchang chhiar chhunzawm duh tan kum 4 kal tawh a mi tawh, a hnuaiah hian ka rawn dah tel leh e.
Source :
The Hindu
April 03, 2024
~~~~~
Thu belh :
EMERGENCY LAIA INDIRA DAN SIAM FCRA CHU MODI SORKARIN KHIRH ZAWKIN A SIAM ȚHA
Sept 22, 2020 Tuesday
Prime Minister Indira Gandhi dan sual leh rapthlak tak (draconian law) Foreign Contribution (Regulation) Act (FCRA) 1976 chu Congress Sorkar laia siam a ni a. Kum 2010 UPA II Sorkar Manmohan Singh hunah khan a hma aia khirh zawka thlak danglam a ni a. Tunah Narendra Modi Sorkar hian hemi aia khirh leh zual sauhin khami țuma tih hmaih leh awng awm chhe te pawh hmaih leh hauh loin a rawn hnawh ping fai ta vek a tih theih hial awm e.
FCRA chu eng nge?
Foreign Contribution Regulation Act (FCRA) chu India ram chhunga cheng mimal, pawl etc ten India ram pawn ațanga thil bik, hna țha leh țangkai atan țanpuina leh chhawmdawlna, dan ang taka an dawn theihna hi a ni.
FCRA chungchang India ram journalist senior leh lar Sekhar Gupta thlirna chu hetiang hi a ni e.
Tunge he dan hi siam?
FCRA dan hi Prime Minister Indira Gandhi hun lai Emergency vung vang lai taka siam kha a ni. A tir phawt a he dan hmanga Indira tum chu a khingpui political party dang ten ram pawn ațanga țanpuina an dawn țhin dan chahna atan a ni. He dan hi a pian hlim ațang rengin a chhiain a rawng a, hnam dang leh mi dang reng reng ngaih theih lohna a pian chhuahpui nghal a nih avangin tun thlengin he dan hian tu tute emaw dan chah tumna a la ni zel a ni.
Indira Gandhi khan kha tih hunah khan mi dang zawng zawng khan amah kha phiarru leh a chhiatna zawngah a ngai a, chung zingah chuan politician lar George Fernandes te ang kha international socialists te nen thuk taka inthlung niin a hria a, chung zingah chuan Willy Brandt, German ram hruaitu pakhat leh European socialists hruaitu lar kha a ni.
Hetih hun lai hian hruaitu țhenkhat communist lam awn hote (pro-CPI) khan mimalin țanpuina North Korea, Soviet Union ațangin an dawng țhin a, chung chu țanpuina ( donations) anga chhiar loin 'belhchhahna' (supplement s) mai a ni.
He dan hian a tir taka khap a tum chu ram dang țanpuina ( foreign contributions) chu Chanchinbu lam a thawk te: editors, correspondents, columnists, printers, publishers te dawn phal loh tura dan siam a ni. Hemi bakah pawimawh tak mai chu cartoonists te an ni . “Ka hmuh dan chuan amah [Indira Gandhi] kha cartoonist Abu Abraham leh RK Laxman te cartoon ziah țhin khan a ti thinrim țhin hle a, chuvang chuan ram dang ațanga dawng thei lo tur zingah cartoonist te hi telh an ni,” tih thu Sekhar Gupta chuan a sawi.
UPA in an ennawn
FCRA, 1976 hi Manmohan Singh kaihhruai UPA-II khan kum 2010 khan a hmaa dan awmsain a hlin theihna chu chip leh rek leh zual sauhin hrui hrual siam belhin FCRA Dan chu an ennawn a, hemi behchhan hian sakhaw danga inlehna atan hman țangkai khapna atan hman phal lohna thu pek te siam a ni ta zel a ni.
Tunah hian he dan Modi Sorkar kha mi țuma hmaih anga ngaih theih fet leh zuala an rawn ennawn leh hi Congress chuan nasa takin an rawn sawisel leh thung si a ni.
“Kan ramah hian, Dan țha lo tak siam akhawih nih hian a hnuah chu dan chu tumahin siam țhat an tum ngai lo. A dik tak chuan tumah hian chutiang dan chhia chu siam țhin a, a țha zawka thlak tumna an nei lo. Thlak leh siam țhat a hnekin chhe leh zual sauha siam chakna hian an khat zawk a ni," Sekhar Gupta chuan a ti.
Siam danglam te
Tun Parliament session a Modi Sorkarin FCRA dan a siam danglam zingah ram dang țanpuina dawng thei lo tur zingah Indian Penal Code (IPC) in "public servant" a tih te telh thar an ni . Tun hnuah chuan politician, Chanchinbu mi, roreltu te (politician, media personnel, legislator) tumah ram dang ațanga țanpuina dawn phal a ni lo.
He dan siam danglamin a chu ram dang ațanga țanpuina hi tumahin hetiang a nih chauh loh chuan dawn phal a ni lo : Government of India hnenah phalna an dil hmasa emaw FCRA licence an neih loh chuan . He dan ( original law) hian FCRA licences chu a nghet (permanent) ni turin a duang a. Hei hi Manmohan Singh kaihhruai UPA II Sorkar khan dan awmsa chu rawn thlakin a nghet țhin kha kum 5 atan a rawn thlak danglam ta a ni.
“Hemi avang hian kum 2015 khan India ram chhunga NGO 10,000 chuang fe-in FCRA licence an lo neih tawh sa chu an chan/hloh nghal a, a thar hlaka dil țhat an ngai leh vek a ni,” Sekhar Gupta chuan a ti.
A pahnihnaah chuan, he dan ( original law) hi chuan ram dang țanpuina hi a dawngtu lamin an duh anga hman phal a ni a, mahse he dan kum 2010 a siam țhat (amendment) chuan ram dang țanpuina dawn ațanga 50% chin bak chu an in enkawlna senso (administrative expenses) atan an hmang tur a ni lo tih dan a rawn siam thar a. Hemi vèk hi BJP Sorkar chuan tunah hian 20%ah a rawn dah hniam leh ta sauh a ni. Chu mai bakah ram dang țanpuina dawng tur chuan NGO enkawltu board of directors zawng zawng leh CEO leh thawktu pawimawh zualte Aadhaar numbers te ram dang țanpuina FCRA license hmu tura thil țul ah a rawn dah belh a ni. Hei hi a hma lama ngai lo țhin kha, a rawn phut thar ta a ni.
Pathumna, Manmohan Singh kaihhruai UPA II Sorkar hun lai dan siam danglamah a tum chu Government of India in NGO ram dang țanpuina dawng zingah rinhlelhna a neih chuan an pawl chu thla 6 (180 days) chhung atan a hrem (suspend) thei a ni.
Modi kaihhruai NDA Sorkar chuan chu hremna dan kum chanve ni țhin chu, kum khat atan a rawn pawhsei belh ta a — hei tak hi tuna Congress in nasa taka an sawisel chu a ni.
A dawt lehah chuan, tuna dan siam tharin a rawn khap thar chu FCRA licence nei NGO ten NGO FCRA licence dang nei te hnena sum pek leh hlan chhawn a khapsak ta a ni. Hei bakah hian he sum ațanga bank interest awm te pawh FCRA khapna chi hrangin a huam tel nghal vek ang tih a ni.
Tuna BJP Sorkarin FCRA chungchanga an țan hmun lian tak pakhat chu foreign contributions hmuh hi kum 10 kal ta chhung khan a letin a pung a, chu bakah data in a tarlan chu he sum dawngtu zingah tam takin an dawn chhan ang ni loin an hmang a ni tih thu Sekhar Gupta chuan a sawi bawk .
September 9, 2020 khan FCRA u/S 12(4) - misutilization of funds behchhanin an FCRA Registration/license hrensak pawl 13 (suspend) an awm. Tribal zinga Kristian sakhuaa inleh luih tirna (forced religious conversion) atan an sum te hmanga puh an ni a. Insawi fiah tura tih (show cause notice) pek an ni a, hun tiam chhungin tumahin chhanna an theh lut lo a, hun tiam pelh hnuah NGO pakhatin chhanna an theh lut a, Ministry of Home Affairs in an chhanna chu lungawithlakah a ngai chuang lo. Heng FCRA licence hlihsak zingah hian Ecreosoculis North Western Gossner Church, New Life Fellowship, Evangelical Churches Association te an tel.
India ram chhunga voluntary organisation inzawmkhawmna pawl lian ber VANI (Voluntary Action Network India) chuan FCRA Amendment Bill 2020 nimin September 21 a Lok Sabha in a passed tak chu Standing Committee of Parliament ah ngaihtuah nawn turin a ngen. He dan siam țhat ang hi chuan foreign ațanga tanpuina dawng țhin NGO te chu "engmah hmaa thiam lo sa leh dan bawh chhe nghal sa an ni a, an tan tih ngaihna a awm lo a, India ram chhunga vantlang ham țhatna atana thawk țhin NGO te tih tawp leh dan chep tumna a ni," tih VANI thu chhuah chuan a tar lang.
SAWI BELHNA
Ram dang țanpuina hi India ram chhunga Non-profit sector -- NGO ten development projects atan te, research organisations te, civil society, activist etc ten an dawng thei a ni.
Sorkar ngaihdanah ram dang ațanga țanpuina lokal țhin hmanna hi thil țha lam hawi leh lang tlang taka hman tura ngaih a ni. Ram tan a țha lo lam national interest kalha hman tura ngaih a ni lo. Sakhuana lam thil Christian NGO, Muslim Jihad Group te a nihna ang lo zawnga hmang țhina puh an ni fo bawk.
He dan huaisar tak (draconian law) chungchangah hian India rama party lian pahnih te chuan thu neihna an chan loh laiin na takin an sawisel ve ve a, thu neihna an chan erawh chuan he dan nuai bo leh paih ai chuan khirh leh khauh zawkin dan awmsa an siam danglam ve ve tawh a ni.
He dan hi a pian tirh te ațangin mi tute emaw huat leh do a nei sa nghal a, a kum a tam tial tiala, a do leh huat zawng seng luh belh zel zawng a nih hi.
Union Home Ministry, FCRA Division data ang chuan tunah hian FCRA Registration nei 22,447 an awm mek a, heng zinga 21,915 ten 2018-19 atan FC Returns an file a ni.
Source :
The Print
September 21, 2020
Ministry of Home Affairs
Foreign Contributions Regulation Act, 1976
======210920
Huna Kawlvawm
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: