PATHIANIN TIHTUR NEIIN A SIAM CHE

 I Nun Thiltum Puanchhuahna

-  Rick Warren 

-  April 2, 2024

“Thil tha ti atan Krista Isuaah chuan siama awmin ama kutchhuak kan ni si a; chu thil tha tih chu kan awmna turin Pathianin a buatsaih lawk a ni.” (Ephesi 2:10)

He leiah hian mahni tana nung tura duan kan ni lo va.

Hnathawh a, upat hnua thi tur ringawta duan ni lovin, chu aia nasa zawk thawk tura duan. Tihtur neia duan, chu tihtur chuan nun awmzia chu a hriattir thung ang che.

Bible chuan,“Thil tha ti atan Krista Isuaah chuan siama awmin ama kutchhuak kan ni si a; chu thil tha tih chu kan awmna turin Pathianin a buatsaih lawk a ni,” a ti. (Ephesi 2:10)

Tawngkam danga kan sawi chuan, i danglam bik a ni. Khawvel ah hian, hun kaltawh, tun hun leh hun lo la awm tur ah pawh nise - nangmah ang hi an awm thei chuang lo. Danglam taka Pathianin a siam che avang hian khawvelah hian a then a zar chau i thawk thei dawn a. Chung chuan i nuna tihtur chu a rawn siam chho zel dawn a ni. 

I nuna tihtur awm chu i hriat hma chuan, i awm ve satliah tihna a ni. Nun chu a tluang a ni maithei, nimahsela i nuna Pathian thiltum i thelh a nih chuan a famkimna chu i chang thei dawn lo a ni. 

Isuan Marka 8:35 ah, “Tupawh a nun humhim duh apiangin a chan ang a; tupawh keimah avang leh Chanchin Tha avanga nun chan apiangin a humhim ang,” a ti.

Pathianin i nuna a thiltum chu i hlen theihna turin hun remchang a siamsak che a. Chu chu lungphum nghet - Isua Kristaa innghat hmang chauhin a thawh theih a ni. “Lungphum rem tawh sa lo chu lungphum dang tuman an rem thei tawh si lo va, chu Lungphum chu Isua Krista chu a ni” (1 Korinth 3:11)

I nun chu lungphum daihrei tur Isuaa innghat chungin i hmang thei a. Anihloh pawhin nangma chhiatna tur kawng zawh pawhin i hun i hmang thei bawk. 

Thil chiang tak pakhat awma chu engtikni ah emaw chuan Pathian hmaah dingin he zawhna hi a la zawt dawn che: “Leia tihtur ka pek che kha i hlenchhuak em?” Chumi hunah chuan Pathian thiltum chu i nunin a hlen leh hlen loh kan hre tawh ang.

Pathian ruahmanna anga nung turin tlai luat a awm lo va. Lungphum Isuaa hmangin nun bul tan la, Pathian thiltum chu vawiin atang hian umzui nghal ang che.

Ngaihtuah zui atan

* Pathian thiltum ang ni lova, mahni duhdan anga hun hmangte engtin nge an awm? Nang pawh chutiang ang chuan engtin nge i awm ve?

* Mi thenkhat ten engvangin nge Pathian thiltum hre turin rei tak an hun an hman nia i hriat? 

* I nuna Pathian thiltum danglam bik eng nge i rin?

Pathian thutiam chhandamna chu Isua Krista kaltlangin a ni tih i pawm tawh em?

Isua Krista hnenah i nun i hlan thei anih chuan, he ṭawngṭaina hmang hian ṭawngṭai rawh le: 

“Aw Lalpa, a dera nun reng leh lemchan nun hmana mite tlawn reng leh ka nih theih loh tur mi famkim nih tuma hun hman reng hi ka ning ve tawh a. Ka nun hlui avanga hrehawmna insiam reng hi ka peih tawhlo a ni. Hnawl nih hlauhnate leh chiang zawka inhriat hlauhnate  hi ka ning tawh a. Liam tir vek ka duh tawh a ni.

“Lalpa, zahna, pawi tihna, inchhirna leh lungngaihna min thlentu zawng zawngte i hnenah ka hlan fel ta che a. Chutianga hun hman chu ka duh tawhlo a ni!  Zalen taka nun hman ka duha, chu chu I Fapa Isua Krista aṭang chauhin a neih theih tih ka hria a ni.

“Vawiinah hian ka sualnate ka puanga, min ngaidam turin ka dil a che. Kross a i thihna leh thawhlehna avanga min ngaihdamna leh min pawmnaah hian lawmthu ka hrilh a che. Ka Lalpa ni turin ka pawm ta che a, damchhunga i hnung zui hi ka duh a ni. I hmangaihna, beiseina in min chhungkhat la, hlauhna ni lo vin, rinnaa ke pen thei turin min pui ang che. Isua hmingin ka dil e. Amen

Tunah khan i ṭawngṭai thei a nih chuan, hetah hian minlo bia la Rick@PastorRick.com min han hriattir ang che. Isua nena zinkawng i zawh theihna tura thi pawimawh ka lo thawn dawn che a ni.  

[Lettu: Sangpuia]