MZP-in Zirlaite ruihhlo laka an fihlim theih nana hmalak rel; ramriin a then darh tawh kan nih avangin kan in hriatthiam tawn a ngai a, i in dawh tawn hram hram ang u

Aizawl | April 11, 2024: Vawiin ni 11 April, 2024 (Ningani) cawhma dar 10 khan Mizo Zirlai Pawl (MZP) rorelna sang ber dawttu Federal Council Sitting vawi 47-na (2023-2025 term-ah vawi 1)-na chu School Education Directorate Conference Hall Aizawl-ah neih a ni a. He hun hi Pu C. Lalremruata Vice President-in a kaihruai.

He hunah hian MZP President, Federal Council Sitting House Leader ni bawk Pu H. Lalthianghlima chuan House Address a nei a. "Tlang hrang hranga MZP ten kan ram leh hnam tan ngaihtuahna kan sen thar a ngai a. Zirlaite thlavang hauh tur leh thil diklo siamṭha turin i in sangmar ang u" tiin palai kalkhawmte a sawm.

MZP President chuan, tun hnaiah hnalak diklo leh fair lo hi MZP hian kan hrechhuak nasa em em a. Hei hi MZP hian dodal lo ila, siamtha tu tur dang an awm lo a ti. Kan unaute buaina avangin Mizoram an lo pan khawm mek a, tawng hrang hrang an hmang a. Kan nunphung pawh a inang diak diak kher lo. Nimahsela, ramriin a then darh tawh kan nih avangin kan in hriatthiam tawn a ngai a, i in dawh tawn hram hram ang u a ti bawk.

MZP Federal Council Sitting vawi 57-na palai; MZP Headquarter, Sub Headquarters, Branch, Hnampual leh Colleg S.U aiawh kalkhawmte chuan a hnuaia mite hi lungrual takin a pawm:-

i) Sairang thlenga rel a lo luh thuai dawn avangin, Sawrkar in Inner Line Permit (ILP) check dan turah ruahmanna felfai zawk a siam theih nan, MZP in hma la rawh se.

ii) Mizoram Education Department bik enkawl tu tur Mizoram Education Service (MES) kan neih ngei theih nan, MZP in chak zawkin hma la rawh se.

iii) Mizo Zirlaite ruihhlo laka kan fihlim theih nan MZP in hma la rawh se.

iv) Ram pum huapin ‘Career Awareness’ neih a nih theih nan MZP in hma la rawh se.

v) Mizoram zirnain hma a sawn theih nan, tuna hman mek kan syllabus hi zirchiana, a tul anga hmalak ni rawh se.

vi) Zofate sumdawnna leh inchimralna kawng a kan him tlan theih nan, MZP hian zirchianna leh inhrilhhriatna (Awareness Campaign) nei se, a tul anga hmalak ni rawh se.

vii) Mizoram ‘Schedule Tribe’ list ennawn a nih theih nan chak taka hmalak ni rawh se.

MZP Federal Council Sitting rorel zawh hian Pu L. Ramdinliana Renthlei Adviser leh Pu Peter Lalzawmliana Adviser ten hruaitute fuihna thu an sawi a. MZP tlang hrang hrang atangin palai thahnem tak an kalkhawm a ni.