Lawngtlai DC-in hnam dang ILP neih ngai lo anga a sawi MSU Chawngte-in hriatthiam har ti

Aizawl | April 3, 2024: MSU Chawngte chaun thuchhuah siamin, Deputy Commissioner (DC) Lawngtlai-in hnam dang voter ID a neih avangin ILP a neih a ngaih loh thu a lo hrilh nia sawiin, MSU headquarters, Chawngte chuan hriatthiam har an tih thu an tarlang.

Mizo Students’ Union, General Headquarters: Aizawl thuchhuah No.B.102/MSU-GHQ/2022-2024 bawhzuiin MSU headquarters: Chawngte chuan an area ah Inner Line Permit (ILP) an enfiah a, ILP fello tam tak hmuhchhuah a ni a, a rang lama renew turin an ti a ni.

Mizo Students’ Union, Headquarters; Chawngte area ah hian hnam dang (Vai) sumdawng leh Mistiri tam tak an awm a, Mizorama Voter ID an neih avanga ILP an neih angaih loh thu an sawi thin. MSU chuan ILP leh Voter ID in inzawm na an neih loh thu hrilh in kum 1950 hma lama awm te chauh ILP an ngaih loh thu in an chhang a ni. Mizorama Voter ID nei pakhat Chawngte khurchhung a mi Mr.Pran Gopal Sutradhar ID no.MBS1175182, Adhaar No.3380 6641 4257 chuan Chawngte-ah nupui Sabita Chakma a nei a, ILP a nei lo tih hmuhchhuah niin siam turin a ti a; amaherawhchu, Deputy Commissioner (DC) Lawngtlai chuan voter ID a neih avangin ILP a neih a ngaih loh thu a lo hrilh a ni.

Hemi chungchangah hian MSU headquarters, Chawngte chuan hriatthiam har a ti a, Voter ID nei ten ILP an neih angaih loh zel chuan Mizoram hi inchimralna lakah kan derthawng hle niin a hria a, eng dan tlawhchhanin nge Voter ID nei ten ILP an neih angai loh tih sawifiah turin MSU chuan an ngen a ni.