Khelo Women's Football-ah Springfield HSS an Champion

Mizoram Football Association leh Sports & Youth Services Department in an buatsaih Khelo India Women's Football League hmasaber ah Springfield Higher Secondary School, Aizawl an champion ta. Vawiin ni 30.4.2024 Thawhlehni hian Aizawl Sipai Lammual a final hmuhnawm takah Springfield HSS hian St. Joseph Higher Secondary School, Aizawl chu sihnih faiin an hneh a, goal hnihte hi Lalsangpuii Sailo leh Vanlalrohlui ten Extra time a an thun a ni.

Hun pangngaiah goal a luh loh avangin minute 20 hun pekbelh an khel a, Springfield hian chhanlet loh goal hnih an nei ta a, Champion's Trophy Nomawi leh cheng singli an dawng a, 2-na St Joseph HSS in trophy leh Rs. 15,000/- an dawng thung.

Lawmman dangte:-

Player of the match:  J.Lalparmawii.  Springfield HSS.

Fairplay lawmman : St. Joseph HSS. Rs.5,000/- + Trophy 

Best Player : Lalsangpuii Sailo, Springfield HSS. Rs.2,000/- + Trophy 

Top Scorer : Lallawmzuali, St. Joseph HSS. Rs.2,000/- + Trophy

Khelo India Women's Football League final ah hian Pu Lalramsanga Sailo, IRS, Secretary, Sports & Youth Services Department chu khuallian niin MFA leh SYS ten Khelo Women's League hlawhtling tak an buatsaih chu lawmawm a tih thu leh, India sorkarin hmeichhiate dinhmun chawikan duh a, infiamna lamah pawh nasa taka tan lak a nih thu te, theihna/talent nei tha te sang taka vawrh zel an nih tur thu a sawi a, lawmman a sem nghal bawk.

MFA hruaitute leh Women and Child Development hruaituten lawmman an sem ve bawk.

Vawiin Khelo India Women's Football League final ah hian Miss Mizoram 2024 Winner leh Contestant dangte rawn telin MFA Women's Committee member te nen penalty shootout ah an inel a, inkhel entute mit an ti tlai hle a ni.