Aizawl | April 22, 2024: Vawiin April ni 22, 2024 (Thawhtanni) hian Mizo Hnam Runah chhung inkhawm neih a ni a. Hun hnihna political session-ah Pu K.Vanlalvena Lok Sabha MP candidate chuan amah duhsak taka candidate petu MNF hruaitute chungah leh duhsaka amah vote-tu zawng zawngte chungah lawmthu a sawi hmasa a. Pathian chu engkim ti thei, a chungah rinna kan nghah chuan engkim a ti thei vek a, a rintlak a ni a ti.
Pu K.Vanlalvena chuan MNF Campaign Directorate leh party worker rim taka thawktu zawng zawngte chungah lawmthu a sawi a. Campaign-na tur sum a neih loh thu sawiin, hmun hrang hranga mahni sum senga feh chhuak zawng zawngte chungah lawmawm a ti a. Nikum MLA inthlana MNF candidate vote lotu tam takin tun MP thlanah kha chuan amah an vote nia a hriat avangin lawmawm a ti a. Hman ni lawka tla hlim ni mah ila; kan party kan inlungrual tha a, tlin leh tlin loh chu Pathian thu thu ni mahse, beiseina sang tak a neih thu a sawi a. Rulling party khing kan ni a, opposition party hrang hrangin candidate kan nei a. Beisei ang kan lo pha ta lo anih pawhin Pathian remruatah pawm thiam ang u, a ti bawk.
Pu Tawnluia, Chairman MP Election Campaign Directorate MNF pawhin tun MP inthlana MNF party worker zawng zawng te, law & order kengkawhtu te, MPF leh tlawmngai pawlte chungah lawm thu a sawi. "MNF Candidate Pu K.Vanlalvena lakah hian party kan lungrual em em a, hmun hrang hrang atanga report kan dawn danin beiseina kan nei sang hle," a ti. "Tun tum MP thlan khan kan party-ah tanrualna tha zawk a rawn pholang leh a. Kan ram kan hnam sakhua venhim hi MNF chuan kan thupui ber niin Mizo Nationalism champion pui hi kan tum ber a ni. Kan candidate Pu K.Vanlalvena hi ram tana mi huaisen tak ani tih mipuiin an hriat avangin hnehna chan ngei kan inbeisei a ni," a ti bawk.
Pu Lalruatkima Vice Chairman Campaign Directorate & Treasurer MNF pawhin report pein, thawktu hrang hrangte chungah lawmthu a sawi. MNF hian tunlai khawvel mila ke kan pen zel a tul thute a sawi a. ZPM lam pawh MLA thlan ang em em kha chuan neutral-in an thlawp tha tawh lo nia a hriat thute a sawi a. "Khawvelah Zirtawpni a awm lo a, kan ram leh hnam kaihruai tur hian inzir zel tur kan ni," a ti. MPF leh sorkara mawhphurtu hrang hrang te, tlawmngai pawlte chungah MNF hmingin lawmthu a sawi bawk. "Campaign chhung zawnga Pathianin min hruaina zawng zawngah lawmthu ka sawi a ni," a ti bawk.
MNF President Pu Zoramthanga pawhin thu tawi a sawi a. Chhung inkhawm hi Pu Vanlalzawma, Vice President MNF chuan a kaihruai a, Pu K.Laldawngliana MLA & Adviser MNF General Headquarters chuan hunserh a hmang.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: