INDIA RAM HI AUTOCRACY RORELNAAH A TLU LUT MEK

- Vanneihthanga

April 14, 2024: Nimin lama thil thleng Meitei hoin Manipur Saikul khaw mi (Kuki) pahnih an thah, diriam taka an ruang an suasam dan video chu nizan khan ka thianpain min share a, hetiang video hi ka en duh ngai lova, nizan chu ka en ta vek mai a, an nun a rawngin a rapthlak ngei mai! Thinlung chhungril a na vawng vawng mai!

Heng buaina leh inpawng nekna, inthahna rapthlak hi Modi leh Amit Shah te pahnih hian an haider lui tlat a. Mipui rorelna chhe mi, autocracy India ramah an practice mek a nih hi! An hmabak chu Mizoram kan nih hmel tawh tlat mai!..😡

Dan rorelna, 'Rule of Law' in India ramah awmzia a nei tawh lo ni ber hian a lang a. BJP te hian India ramah an duh anga an lal reng theih nan, India ram dan tam tak an ti danglam tawh a, CBI, ED etc etc..an control vek a, dan leh thupek kenkawhna lama kutke pawimawhah an mi leh sa te an dah nghauh nghauh mai a. Delhi sorkar an han suasam dante khu a rapthlak a ni. Supreme Court Chief Justice Dhananjaya Y. Chandrachud khu a huaisen em em a, an duh angin an control thei lo. India ram himna kulhpui kan neih chhun a ni rih ta mai. Engchen nge a ni pawh hi a kal theih ang? Ngaihtuah tham a tling takmeuh a ni.

Article 371G kan la nei hram hram a, hei hian eng chen nge min hum theih ang tih sawi a harsa khawp mai! FC Act te pawh an amend hmiah mai a, UCC te pawh hi an la hmang lui mai ang em? India ram state zinga an mutan neih lian tak pakhat chu Mizoram hi kan niin a lang. Tun dinhmunah BJP hi la sorkar leh maithei dinhmunah an ding a, Kan hmabak hi a thim viau a ni.

BJP sorkarna hnuaiah India ram hi, Press freedom index-ah ram 180-ah 161-na kan ni mek. A zahthlak hle mai! BJP hi khawvela political party lian ber leh hausa ber a ni a, an tana hnawksak thei tura an ngaih chu an lei zel mai a, tunhma lama kan hriat lar thin Aaj tak TV channel te kha an lei a, tunah chuan thehmeh ang hmiah an ni tawh. NDTV te pawh an lei a, en tlak a awm tawh lo. BJP propaganda vawrh darhna hmanruaah an hmang tawh. Press mite zalenna an rap bet a, an duh loh zawng sawitu journalist te chu Unlawful Activities (Prevention) Act tlawhchhanin an man a, jail-ah rei tak tak an khung zel mai. Press freedom a awm tawh lo. Press mite zalen lohna ram ram tha leh ram zalen a awm thei lo.

Supreme Court thlengin an inrawlh nasa thin a, Ranjan Gogoi (46th Chief Justice of India from 2018 to 2019) te kha an hmang tangkai hle. Ayodhya leh Rafale deal chungchangah te khan BJP lam thiam chan tirin hma a la a, a hnu lawkah Rajya Sabha MP ah an dah mai a. Tuna kan supreme court chief justice hi erawh an control thei rih lo a, hei hi kan innghahna awmchhun a ni ta chauh mai.

Heng han sawi hian Mizo tamtakin insawithaihna ang lekah an ngai thin a, central politics uluk leh chik zawka thlirin, khing kan han sawi takte khi phuahchawp a ni lova, India ram dinhmun kan hriat ve phak atanga kan hmuh leh hriat a ni.

Autocracy hi India ramah BJP sorkar hian a practice ve mek tih hi thil thleng hrang hrang atanga thlirin a chiang viau a ni. Thuneihna pumhmawm duh luat vanga pawisak neih lohna chu Manipur state-ah pawh chiang takin kan hmu mek a, dan rorelna rahbehin a awm a, tlangmi kan unaute nuai chimih tumna hi a la kal reng. An haider lui tlat mai a ni. Insawithaihna lam a ni lo.

Central BJP sorkar hian, executive leh judiciary thununin, party dang tana chet ngaihna awm miah lovin thuneihna an pawng lak mek a ni a. Kan hmuh phak reng Burma ramah a thleng chamchi a, Russia-ah Putin hi a dam chhungin a lal mai dawn. Chutiang rorelna diklo chu India ramah hian a thleng chho tan mek a, democracy rahbehin a awm a, BJP te khingpui lian ber congress party sum hman theih loha election dawna an han hreng tlat mai te hi an sapatal tawh a nih hi.

Modi & Shah te inkawp hian, Democracy atanga Autocracy rorelna kalpui hi an tum ber niin a lang ta a, kan hmalawka election neih turah pawh, party dang che thei lova siam chu an tum ber a ni a. Absolute majority nei turin Executive leh Judiciary an thut bet mek a, an dan siam leh sum thiltihtheihna hmangin media an control mek bawk. An tana hnawk thei tur chu, media an ni emaw, party dang hruaitute thlengin harsatna an siam sak a, jail-ah khungin thubuai an awrh tir zel mai a ni.

Manipur Governor, Annusuyia Uike leh an High Court khi en ta ila; dan rorelna a tluchhia a ni. Manipur-ah Zofate leh Kristiante lakah eng anga pawi khawihna pawh thleng se, sual/crime a tling thei lo. Insuasamna, inthahna, Biak In za tel tehmeuh hal chhiat pawh thil dik lo rapthlak ni mah se, a ti tute hrem tumna a awm lo. Dan anga rorelna a awm tawh lo! Police leh sipaite camp/station atanga silai sangtel a bo pawhin, crime a tling lo. In tamtak a kan ral pawhin, ngawihsan a ni. A chhan chu, Modi leh Amit Shah te hian, democracy lungphum pahnih; Judiciary leh Executive an thunun tlat tawh a, an duh anga rorel turin DAN an palzutin an duh angin an siam thar mek zel a ni. Heihi autocracy kalkawng a ni a, Parliament-a absolute majority an duhna chhan pawh AUTOCRACY an duh vang a ni.

Tun MP inthlan lo awm turah hian an tum anga absolute majority neia sorkarna BJP in an chan chuan, India ramah hian party dang an lal leh mai mai tawh ngai lovang. Keini hnam tlem, intodelh si lo. An huat em em christian te hi min dimdawi hauh lovang tih hi ka thlir dan a ni.