Electric Veng-in YMA Chhang zan hmang

Aizawl | April 6, 2024: Electric Veng Branch YMA chuan April ni 5 (Zirtawpni) zan khan EYMA Hall-ah 'YMA Chhang Zan' ropui takin an hmang. He hunah hian YMA Chhang te chuan Cheraw, Tlâng Lam, Sarlamkai, te an entir a, YMA Chhang Band leh YMA Band te an zai mai bakah zaithiam chuai theilo Vanlalhlana a zai bawk.

YMA Chhang te hi an sikul chawlh hun chhungin Electric Veng Branch YMA hmalakna in Hnam Lam, Hnam Hla te zir pui ṭhin an ni a. March ni 4 aṭang khan an zir ṭan a, hming ziak zawng zawng hi mi 322 an ni a, veng pawn aṭangin mi 11 an tel bawk.

Aia Upate Zah Thiamin, Ka Pianna Zoram Nuam, Ro min rel sak ang che, Parmawi thang vulna leh Aw Mama Hla te zir pui ṭhin an nih mai bakah veng chhung leh veng pawn aṭangin mi thiam bakah Aizawl District Child Development, Social Welfare Department ten YMA Chhang te hi hun an hman pui ṭhin a, an nun chhoh zelna tur atana thil pawimawh leh ṭangkai te leh fuihna thu ṭha tak tak te Zonun Zemawi Tlawmngaihna thu te ngaihthlak ṭhin a ni bawk.

Electric Veng YMA chuan YMA Chhang te tan hian Electric Veng Indoor Stadium chu thla khat chuang hawh theih lohin an dah tawp a, YMA Chhang hruaitute an lawm hle. YMA Chhang te hi Vakul Chang Cultural Club, Electric Veng te chuan hnam lam an zirtir thin a ni.