PATHIAN ṬHATNA CHU CHATUAN DAIH A NI

 A Tho Ta

By Rick Warren 

— March 27, 2024

“Lalpa inah kumkhuain ka awm reng ang.” Sam 23:6

Pathian ṭhatna zawng zawng zingah thil pakhat chiah thih hnu piahlam thleng daih a awm. Sam 23 tawp lamin a sawi hi Pathian ṭhatna entirna ṭha ber a ni: “Lalpa inah kumkhuain ka awm reng ang.” (Sam 23:6).

Chumi awmzia chu thihna hi i hlau tur a ni lo tihna a ni — a chhan chu thihna hi a tawpna a nih loh avangin. Pathianin a tawpah a ṭha ber chhandamna a dah a ni. He leiah hian nun harsa takin awm mah la, Isua Krista chu chhandam tura i ngen a nih chuan, Pathian inah kumkhuain i cheng ang. Chutah chuan lungngaih te, tuarna te, sualna te, natna te, manganna te, harsatna te, damlohna te leh thawpikna te a awm tawh lo vang. Vanram chu awihawm lo khawp hial a ni a. Chutah chuan Pathian ropuina chuan a nghak reng che a ni.

Bible chuan, “Kan bawhchhiatnate avanga thi kan nih lai meuh pawhin Krista rualin min tinung ve a, khawngaihnaa chhandam in ni ta e, Krista Isuaah chuan ama rual veka min kai thovin, van hmunahte ama hnenah min thuttir ta a: chutichuan hun lo la thleng turahte chuan Krista Isuaah hian kan chungah ngilneiin a khawngaihna ngah nasatzia chu a entir thei ang.” (Ephesi 2:5-7).

Ennawm lama i hmuh ṭhin vanram ang hi chu a diklo maithei a ni. Pakhatna, vanram chu duhthusam thlenna emaw tehkhin thu mai a ni lo. Vanram chu thu mai ni lo, a taka awm ngei a ni. Hmun nghet chatuana awm tur a ni a. Pathian chhungte tan chauha dah a ni thung.

Vanram chu hmun ninawm a ni lo! Thupuan 21 ah a tlangpui kan hre thei a ni, chatuan atan inhnial buai awm lo vin hun kan hmang dawn a ni. He leia kan tih ṭhin te pawh kan tih chhunzawm zel theih tur a awm thluah a. Vanramah i ei-in thei dawn a, i mu thei dawn bawk a, in inpawl thei ang a, titi hona, zai leh ṭawngṭai te pawh in hmang thei ang, ka sawi tak te hi a ṭhen chauh a la ni. Vanram chu i tana buatsaih a ni.  

Vanramah chuan i tih theih loh tur pahnih a awm a. Pakhatna, Vanramah chuan thil i tisual thei tawh dawn lo. Pahnihna, Pathian fate chauh an awm dawn avangin ringlomite hnena Krista hmangaihna leh ngaihdamna pawh a awm dawn tawh lo a ni. Chuvangin ringtu i nih ṭan tirh lai khan Pathianin vawi leh khatah Pathianin vanramah a hruai nghal lem lo a ni. Chhandamna Chanchin Ṭha leh khawngaihna hrethiam turin a duh phawt che a ni. Vanram i luh theihna chhan chu mi tu emawin chanchin ṭha an hrilh vang che a ni. Tunah chuan mi dang i hrilh a hun ve ta.

Vanramah chuan hmachhawp engemawzat a awm thei ang. Chatuanin Pathian kan fak ang a. Isua ringtupui te nen kan inpumkhat ang a. Kan rinna, beiseina leh hmangaihna avangin lawmman kan hmu ang. Kan nuam tih zawng tak chu kan thawk dawn a ni.

Thutiam duhawm tak a nih chu. Pathian ṭha a va ni em!

Ngaihtuah zui atan

* Tuin nge Pathian khawngaihna leh lainatna hrilh che? Tu hnenah nge Chanchin Ṭha i hrilh?

* I nunah Pathianin eng nge a pek che? Eng te nge i talent? Engtin nge a ropuina turin i hman theih ang?

* Chhinchhiahna i nei em? Leia i thiltih ṭhin leh vanrama i thiltih tur nen i khaikhin hian engtin nge i ngaih?

Khawiah nge i chatuan hmun i hman dawn?

I sualna te i puang duh a niha, i nunah Isua i thlang duh a nih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawh tanna atana pawimawh te a thlawnin ka lo thawn ang che.

[Lettu: Sangpuia]