ISUA THAWHLEHNA HIAN ENGKIM A TIDANGLAM

  _A Tho Ta_

-  Rick Warren 

-  March 26, 2024

 

“Tin, Isuan a hnenah, ‘Kei hi thawhlehna leh nunna chu ka ni; tu pawh mi ring chu thi mahsela a nung reng ang; nung apiangin mi ring chu kumkhuain an thi lo vang; chu thu chu i ring em?’ a ti a.” (Johana 11:25-26)

 

Isua thawhlehna chuan engkim a tidanglam. Hunbi thenhranna dan A.D. leh B.C. a lo awm phah a. Mihringte chanchin chhuinaah chuan thil pawimawh ber a ni. Chu chuan thil pathum a ti chiang a.

 

*Pakhatna, thawhlehna chuan Isuan a nihna a sawi kha a ti chiang a ni.*

Isuan a sawi nawn fo chu Pathian Fapa kan sualte avanga thi tura lo kal tih hi a ni. A sawi ang ngeiin a ti bawk a ni. Isua thawhlehna chungchang hi khawvel chanchin hlui zirnaah chuan thil thleng chhinchhiahna felfai ber te zing a mi a ni. Fiahna hrang hrang a paltlang a, kum zabi engemaw zat kha a paltlang a ni.

 

Tirhkoh Paula chuan, “A hmasa berin ka hmuh ve bawk chu ka hrilh chhawn che u kha; khatia, Krista chu Pathian Lehkha Thu ang zela ni thum nia kaihthawh a awm a, Kiphaa hnena a lo inlar te kha; chu mi hnuah chuan sawm leh pahnihte hnenah a inlar leh a, chu mi hnuah unau zanga aia tam hnenah a inlar leh a, chu mi zinga mi tam zawk chu tun thlengin an la dam cheu va, thenkhat erawh chu an muhil ta a; chu mi hnuah chuan Jakoba hnenah a inlar leh a; chu mi hnuah tirhkoh zawng zawngte hnenah; tin, a tawp berah chuan a hun lova piang ang, keima hnenah pawh a inlar a.” (1 Korinth 15:3-8)

 

*Pahnihna, thawhlehna chuan Isuan a thutiam a vawng reng tih a ti chiang.*

Isuan tihhluma a awm turzia te, ni thum nia kaihthawha a awm turziate chu zirtirhote a hriattir a (Matthaia 16:21). Chu thutiam chu Isuan a vawng tlat a, Pathian Thu hmun danga thutiam te pawh a ti rintlak a, rinngam vek an ni. Bible chuan, “Pathian thutiamte chu engzat pawh ni se, amahah chuan ‘A ni’ tih chu a awm si a; chutichuan amah avang pawhin ‘Amen’ tih chu a awm a ni … ani chu min chhinchhiahtu leh kan thinlunga zakhamna Thlarau min petu a ni bawk a.”(2 Korinth 1:20, 22)

 

*Pathumna, thawhlehna chuan thihhnu piahlamah nunna a awm tih a ti chiang.*

Isua Kristan Thlarau Thianghlim kan hnena min pek khan Pathian hmangaihna chu kan thinlunga a leih tawh avangin beiseina chuan a timualpho lo va a ti a ni. (Rom 5:5)

“Tin, Isuan a hnenah, ‘Kei hi thawhlehna leh nunna chu ka ni; tu pawh mi ring chu thi mahsela a nung reng ang; nung apiangin mi ring chu kumkhuain an thi lo vang; chu thu chu i ring em?’ a ti a.” (Johana 11:25-26)

 

Bible in min hrilh angin, “Chu miah chuan rin lehzual nan, rinnain Pathian felzia chu a lo lang a, ‘Mi fel chu rinnain a dam ang,’ tia ziak ang khan. (Rom 1:17). Pathian Thu chuan hetiang hian a sawi bawk a, “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilo chuan miin an chhuang dah ang e.” (Ephesi 2:8-9)

 

Isua thihna leh thawhlehna chuan Pathian hnen min thlen tir a chu ngei chu Chanchin lawmawm chu a ni. Kawng danga kan sawi chuan vanram chu Pathian rinna, Fapa Isua Krista kaltlang chauhin kan thlen thei ang tih hi. “Chu chu Pathian felna, Isua Krista rin avanga a ring apiangte hnena tihlana awm chu a ni, danglamna reng reng a awm lo va,” Rom 3:22

 

Ngaihtuah zui atan

 

* Isua thawhlehna hi khawvela chanchin ziakna chhinchiahna felfai tak a ni tih hi engtin nge i hriatthiam?

 

* Isua thawhleha hian Bible thutiam hi i ring sawt nge? Engvang nge? Eng nge a chhan?

 

* Krista hnenah i nun i hlan tawh em? Anih chuan, i tana thutlukna hran siam tur eng nge awm? Anihloh chuan vawiin hian a hnena inhlan mai chu engnge harsatna awm?

*Krista hnena tawngtaia inhlanna*

Isua Krista hennah i nun i hlan thei anih chuan, he ṭawngṭaina hmang hian ṭawngṭai rawh le:

“Aw Lalpa, a dera nun reng leh lemchan nun hmana mite tlawn reng leh ka nih theih loh tur mi famkim nih tuma hun hman reng hi ka ning ve tawh a. Ka nun hlui avanga hrehawmna insiam reng hi ka peih tawhlo a ni. Hnawl nih hlauhnate leh chiang zawka inhriat hlauhnate  hi ka ning tawh a. Liam tir vek ka duh tawh a ni.

“Lalpa, zahna, pawi tihna, inchhirna leh lungngaihna min thlentu zawng zawngte i hnenah ka hlan fel ta che a. Chutianga hun hman chu ka duh tawhlo a ni!  Zalen taka nun hman ka duha, chu chu I Fapa Isua Krista aṭang chauhin a neih theih tih ka hria a ni.

“Vawiinah hian ka sualnate ka puanga, min ngaidam turin ka dil a che. Kross a i thihna leh thawhlehna avanga min ngaihdamna leh min pawmnaah hian lawmthu ka hrilh a che. Ka Lalpa ni turin ka pawm ta che a, damchhunga i hnung zui hi ka duh a ni. I hmangaihna, beiseina in min chhungkhat la, hlauhna ni lo vin, rinnaa ke pen thei turin min pui ang che. Isua hmingin ka dil e. Amen

Tunah khan i ṭawngṭai thei a nih chuan, hetah hian minlo bia la Rick@PastorRick.com min han hriattir ang che. Isua nena zinkawng i zawh theihna tura thi pawimawh ka lo thawn dawn che a ni.  

 

*[Lettu: Sangpuia]*