MZP-in AMC hnuaia hna lak March 15 ral hmaa sut turin phut

Aizawl | March 12, 2024: Mizo Zirlai Pawl (MZP) General Headquarters, Aizawl chuan Aizawl Municipal Corporation (AMC) hnuaia hnalakah thil dik lo inrawlh nia hriain, AMC hnuaia hnalakte hi tun kar chhung (March ni 15) ral hma ngeia sut an phut.

Vawiin ni 12 March, 2024 (Thawhlehni) chhun dar 12 khan MZP General Headquarters, Adviser & Extended OB Meeting a thukhawm a, India Citizenship (Amendment) Rules, 2024 nimina tihchhuah chungchang leh Aizawl Municipal Coorporation (AMC) hnuaia hnalak dan diklo chungchang rel a ni. Meeting hi MZP President Pu H. Lalthianghliman a kaihruai.

MZP chuan Aizawl Municipal Coorporation (AMC) hnuaia Geologist-3 leh Urban Animal Husbandry & Veterinary Officer, Junior Engineer leh Asst Account Officer pakhat theuh lak danah dan kalha thiltih a awm ngeiin a hria a. Mimal induhsakna uchuak tak nena heng hna pawimawh tak hi lak ngei niin hria a. Dan angin Advertisment chhuah a nih loh bakah, State sawrkar phalna an lak hriat a ni bawk lova, danin a sawi angin MPSC emaw MSSSB kaltlanga lak a ni lo bawk. Chuvangin, heng hnalak dan diklo hi MZP chuan tun kar chhung (March ni 15) ral hma ngeia sut turin AMC hotute a ngen a ni.

MZP chuan, sawrkar hna lakah a thiam leh tlingte chauh lak zel a duh a. Mimal induhsakna hmanga hnalak hi kalpui tawh lo turin mitinte a ngen nawn a ni.