MNF-in Lok Sabha MP candidate atan K Vena puang

Aizawl | March 22, 2024: MNF chuan vawiin chawhma dar 11:30 khan Lok Sabha MP Candidate tur an puang a, Rajya Sabha MP nilai K Vanlalvena chu MP Candidate atan an puang.

MP Candidate hi MNF President leh CM Hlui Zoramthanga'n a puang a ni.

Zoram Mipui Candidate Pu K.Vanlalvena B.Sc., MA (Hist.) chanchin tlangpui

Pu K.Vanlalvena hi kum 1970 January ni 14-ah Pu K.Lalzika leh Pi R.Sangvungi te fapa neih chhun ni turin E.Lungdar-ah rambuai khaw khawm laiin a piang a. Farnu pasarih neiin pakhat in a boral san tawh a ni. A pu (a pa pa) hi Pu K. Chaltuaka niin N.Mualcheng lal khawnbawl a ni a, mihlim zawlnei tiin an sawi thin. A pu (a nu pa) hi Presbyterian Pastor Rev. R.Saitawna a ni thung a. Tun thlengin N.Mualcheng-ah in leh lo an la nei a ni.

Pu K.Vanlalvena hian N.Mualcheng Primary School-ah zir zovin Middle School erawh Dawrpui Vengthar Aizawl-ah leh N.Mualcheng-ah te a zir zo va. E.Lungdar High School-ah pawl riat zirin pawl 9 leh pawl 10 chu RM High School Aizawl-ah a zir zo thung a, Pachhunga University College-ah B.Sc. (Mathematics, Physics, Chemistry) tha takin a zir zo a. Kum 1995-ah MPSC kal tlangin Govt High School Teacher-ah lak a ni a, Govt. Hrangchhuana High School-ah Post a ni a. Thla thum lek a thawk hman tihin MZP Gen. Hqrs. President atana thlan tlin a nih avangin High School Teacher hna hi a bansan a ni.

Pu K. Vanlalvena hian pawl hruaitu nihna kawngah tawn hriat a ngah tawh hle a. RM High School Aizawl-ah Pawl 9 a zir laiin Adventure Club Leader-ah leh Class Representative atan te thlan a ni a. RM High School-ah tho hian Pawl 10 a zir kumin Class Representative ah leh Students Union Vice President-ah thlan tlin a ni bawk. Pachhunga University College-ah Pre-University Science First Year-ah Class Representative ah thlan niin, Pre University Second Year-ah Students Union Common Room (Indoor Games) Secretary atan thlan tlin a ni. First Year B.Sc. ah Class Representative ah thlan niin Second Year leh Third Year B.Sc. a zir laiin a kum zawnin Students Union Vice President atan thlan tlin a ni a. Mizo Zirlai Pawl (MZP) Gen Hqrs ah President atan term khat leh Vice President atan term thum thlan tlin a ni bawk. Zirlai pawla a inhman chhung hian Mizoram leh Hnam tan Jail ah vawi-8 a tang a, Jail thleng lovin Lock-up ah vawi-3 a tang bawk. Zirlai hruaitu hlun, zirna ngai pawimawh mi anih avang hian Rajya Sabha MP a nih hnuah, tunhnai mai khan Indira Gandhi National Open University, New Delhi atangin M.A(History) a zir zo leh bawk a ni. 

Pu K. Vanlalvena hi kum 2002 November-ah MNF Party-ah inhmang tanin Thalai General Secretary ah ruat a ni a. MNF party puiah Joint Secretary, Secretary, General Secretary, MNF Thalai President, MNF National Core Committee Member te a lo ni tawh a, kum 2020 June thlaah Mizoram seat neih chhun Rajya Sabha MP atan thlan tlin a ni a, July ni 22, 2020-ah Parliament House ah Mizoram Rajya Sabha MP atan rinawmna thutiam a la a, tun thlengin Rajya Sabha MP a la ni ta a ni.

Pu K Vanlalvena hi Mizoram leh Mizo hnam hmangaihtu, Zirlai pawl hruaitu anih lai pawha ram leh hnam tana huaisen taka ding nghet tlat thin a ni a. Rajya Sabha MP anih tan atanga kum thum leh a chanve chhung mai pawh hian Mizoram leh Zofate tan nghet tak leh huaisen taka ding tlatin, Parliament Session ah vawi 15 thu a sawi tawh a. Chung zinga vawi-13 chu Chairman remtihna in a sawi a, vawi-2 dangte erawh Chairman phal lo chungin, Manipura kan unaute thlavang hauhna thu a auchhuahpui a ni. Parliament Session-ah zawhna puitling vawi 22 leh zawhna tenau vawi 40 vel a zawt tawh a ni. 

Mizoram leh Assam in ramri hnaiha buaina kan neih chungchangah Pu K Vanlalvena hian huaisen taka Mizoram thlavang a hauh avangin Assam sawrkarin amah manna turin Criminal Case a awrhtir a, amah man turin Police officer panga lai Delhi-ah an tir thla hial a ni.

Pu K.Vanlalvena hi Mizoram UPC Kohhranah Upa leh  rawngbawltu niin, Kishangarh New Delhi ah Kohhran Chairman a ni mek a. Shalom Bawngkawn Kohhranah Upa niin thuhriltu leh Sunday School zirtirtu a ni mek bawk a ni.

Pu K. Vanlalvena hi H. Lalhuapzauvi D/o H. Lalrinawma Bawngkawn nen innei in fanu pahnih leh fapa pakhat an nei a. Legislator's Home, Tuikhuahtlang Aizawl-ah leh Meena Bagh New Delhi MP Quarters-ah te an cheng mek a ni.

Issued by Publicity Board MNF