Mizoram State Pool 9 & 10 Ball Championship 2024 khelh mekah 9 Ball-a final khel tur a chiang ta!

Aizawl | March 21, 2024: Mizoram Snooker & BIlliards (MSBA) buatsaih Mizoram State Pool 9 & 10 Ball Championship 2024 chu zanin khan khelh chhunzawm a ni a, Pool 9 ball Quarter final leh Semi final khelh niin Final khel tur a chiang tawh.

9 Ball Quarter final-ah hian T Laltlansanga, Lunglei vs Christopher Zohmingliana, Khatla East, T Laltanpuia, Upper Republic vs Lalsangzela, Khatla South, PB Liansangzuala, Dawrpui Vs Zonuntluanga (Tekawka), Electric Veng leh Zoramliana, Bethlehem Veng vs Lalchhandama, Dinthar ten match a khel a. Quarter Final hi race to 6 a khelh a ni.

PB Liansangzuala hian Zonuntluanga (Tekawka) 6 - 2 hnehin Semi final a inhlang kai a, T Laltlansanga’n Christopher Zohmingliana chu 6 - 2 a hnehin semi final a inhlangkai bawk.

T Laltanpuia leh Lalsangzela ten inkhel hmuhnawm tak entirin, Lalsangzela chuan 6 - 4 in hnehna a chang a, Semi final a inhlangkai a. Lalchhandama leh Zoramliana inkhel-ah hian Lalchhandama hian 6 - 4 in hnehna a chang a, semi final a inhlang kai bawk a ni.

Semi Final match khelh nghal a ni a. Semi Final match hmasa zawkah PB Liansangzuala leh T Laltlansanga te an inkhel a, Semi final match hnuhnung zawkah hian, Lalsangzela leh Lalchhandama te an inkhel.

PB Liansangzuala leh T Laltlansanga te inkhel-ah hian match rukna thleng velah chuan frame an inlak chhawk zak zak a, mahse, a hnu atangin T Laltlansanga hian frame a la zawn ta a, T Laltlansanga hi 7 - 3 a chak a, final a hawlh tling a ni.

Semi final match hnuhnung zawk Lalsangzela leh Lalchhandama te inkhel-ah erawh, frame nga (5) Lalsangzela’n a lak zawn hnu-ah Lalchhandama a rawn tho chhuak a, frame khat a rawn la a. Mahse, Lalsangzela’n lehthal lehin 7 - 1 in hnehna a chang a, final a inhlang kai a ni.

Naktuk atangin Pool 10 Ball khelh tan leh a ni ang a. Pool 9 ball & 10 ball hi a rualin final khelh a ni dawn a ni.

Mizoram State Pool 9 & 10 Ball Championship 2024 hi March 4 khan tan a ni a, March 30 hian a hmawr bawk a ni dawn a ni.