LPS Cup Round of 16 | Ramhlun North 1

Aizawl | March 9, 2024: Moses Lalrinzuala'n hun tawp dawnah penalty pet lutin zirtawpni zanah Sialhawkin goal hnih goal khatin Ramhlun North an hneh a, Mahindra XUV3OO LPS Cup quarterfinal an lut.

Rajiv Gandhi Stadium, Mualpuiah team pahnihin tawiawmtu an nei tha dun hle a, tun kum thum chhunga inelna hrang hranga an intawn vawi thumna niin hun tawp dawnah Ramhlun North an talbuai a, Sialhawkin hnuhma tha an neih tawh chhunzawmin vawi thum an hneh zawn a, round of 16 hnuhnung berah hnehna an chang.

Minute 34-ah Vanlalbiakdika ball pek atangin F Lallawmkima'n hmun awl a nei a, Sialhawk hmahruai nan penalty box atangin goal kilah fuh zetin a pet lut a ni.

Chawlhlawk hmain Ramhlun North-in an si phurh an sut teuh hle a, V Lalchhuanawma corner pet atangin K Zothanmawia'n a chang fal a, goal-ah petin goalkeeper TC Ramnundanga'n a nam chhuak hram.

Seond half tirah Sialhawk defender Vanlalduata'n penalty a chawi a, minute 51-ah Chhuantea'n an si phurh sut nan chiang takin a chhuih lut. Aizawl team-in phur leh zualin an khel a, winger Vanlalhruaia'n penalty box pawnah ball khalh remin a chhuih lut teuh hle a, goal ban a pet per.

Ramhlun North-in khung mai theihna hun tha nei zui mah se Ramnundanga'n chhuah belh lovin goal a venghim tluan a, Divya Player of the Match-a thlan a ni.

Hun pangngai tawp nan minute kua a la awm tihin Sialhawk forward tlan chak Rotluangliana tlar hnung su tlangin a pet a, goalkeeper Vanlalhriata Chhangte rawn tlan chhuakin penalty box pawnah a kutin a dan persak.

Tluanga'n pet zui lehin goal chhan tuma tlan let defender Lalruatdika lu-ah a per a, ball per let pet nawn leh mah se goal hmaa awm Ruatdika'n a awmin a dang chhuak leh a ni.

Ramhlun North him mah se goal veng Hriata hnawhchhuah a ni a, player pakhata an tam hnuah Sialhawkin an nawr hneh a, Moses Lalrinzuala'n freekick hlauhawm taka a pet chuan goal kham perin Aizawl team an him leh hram.

Hun pangngai tawp hnu hun pek belhah Sialhawk forward Lawma'n ding lam sir atanga a siam luh chu Ruatdika'n kut thawhin a dang chhuak a, hun tepterah penalty an chawi phah.

Minute 97-ah Moses Lalrinzuala'n chhuih lutin Sialhawkin hlim takin hnehna an lawm zui a. 2022 khan Inter Village Football-ah Ramhlun North an hneh tawh a, nikum YMA football-ah hneh zui lehin tun hi lungthu an kimna chiah a ni.

Zirtawpni zanah round of 16 zawh fel a ni a, Aizawl district pawn atanga sawm bik pali atangin pathum Sialhawk, Thenzawl Joint leh Kawnpui Joint bakah, champion lai Armed Veng, vawi thum champion tawh Ramhlun South, 2016 champion Bethlehem Vengthlang, Sihphir Venghlun leh Vaivakawnin quarterfinal an lut a ni.

Ramhlun North LC 1-2 Sialhawk VC

⚽RN : V Lalchhuanawma 51' (P)

⚽SH : F Lallawmkima 34' Moses Lalrinzuala 90+7' (P)

Divya player of the match : TC Ramnundanga (J. No 1, Sialhawk VC)