- David Sailo
18th March 2024
Mizo mipui nuai 14 tling lo deuha ngaihte aiawha Lok Sabha MP tura Mizorama Sorkarna chelhtu, ZPM Party in Richie-a tih angreng an vawrh chhuak nulh mai hi thur chhuak nawlh turin eng Criteria tak hmang ang maw?
A Bio-data vawrh larah chuan a hringtu nu leh pa hming mai ni lo, an lârna pho chhuah a ni a, hei mai a ni lo, a pi leh pu hming leh NIHNA thlengin an phochhuak a nih hi !! Lârna, mi lar tih angreng hmachhuan tlat, Personality leh ram hmangaihna kawnga an dinhmun chhut sak lova kalpui hi Dampa bial aṭangin ZPM hian an ching deuh tlat. April thla maia MP inthlan lo awm turah hian Mizo aiawh tura Richie-a Vote hi ka chak vak tlat lo!! Ram tan hnutchhiah a neih sawi tur ka hre ve pha lo.
"We Shall Kill them all" a hian a ngam biah biah viau. UPC a ni a, Aizawl tlangah MLA a tlin a harsa maithei. Mahse, Rajya Sabha aṭangin Lok Sabha a kaisang tur nise, Mizona mawl chilh rût pa hi a Experience enin a âwm ber a tih sak theih ang. ZPM lah Central Sorkar ah an Support lam lah kan hre bawk si lo. Richie-a chu tling se, khawi lam Bench ah nge a ṭhut dawn pawh hriat a la ni lo.
Chung zawng ai chuan kum kha leh chen in zuar, angaihna hria inti a au au, dem tur leh sawisel tur hre takte an rawn ding chhuak a, a ngaihna hriat kawnga an lo pachhiat zia lan fiah nan Adviser 5 leh an khawnbawl te thlengin mipui suma chawm leh hrai turin kan han ruat leh hmiah mai a, a sakechek phunna chuan an ngeng a chhun lo chiang asin !!
Hei mai a la ni lo. Dik leh thianghlim tumte chuan VILTU an mamawh tlat lawi a!! Viltu leh vengtuten tlawn tih tih, fak titihin an vil a, an vil hlawhtlin chuan fak hluah, Super CM thlenga tarlangin, vil hneh loh chuan khawh ṭhuai ṭhuai inpeihin kan han invil tawn a nia. Sorkar hahthlak tak a ni. Inzawrhna, intiamna, kalphung thar anga kal ta mai lova vil zui ngai, tlawn ti tih ngaia dikna kawng zawhpui tum hi chu kum 4 lo awm leh tur thleng hian hna hahthlak a tling chho ngei dawn.
"MLA ṭha 39 aiin CM ṭha pakhat kan mamawh zawk" kan lo tih ve lauh lauhna chilper kha thla 3 liamah uiawm a tling mai dawn !! Theory a ram hmangaih hi a awl ber a, Practical Field ah chuan "Kal hmasa te pawn" tih hmanga namnul chhunzawm Sorkar kan hrawn a nih pawhin tute vil zui lam ni lovin mahni thuthlung bawhchhiatna, tlakna hmakhua tur a ni mahna.
Mipuiin kan theihna zawng zawng hmangin Politics Mathematics kan rawlh a, kum 5 lekah a tlak theih tih hi MNF chhungkua chauha thleng dik tura lo thleng a ni lo. Tu Party chungah pawh a thleng thei tihah chian a hun. Sum puk kha kan sawisel chiam chiam a, puk loh chuan a kal theih loh, hei hi kan puk chhan chu a ni tih inhrilhfiahna, Central Sorkar dawr hawlam Report Detail anga min chhawpchhuah sak loh chuan MNF Term tawp dawn sum pukah khan kan kîr thar leh a ni hawt e!!
Inthlan hmaa mipui ngaihdan lakna rengah "ZPM" tih kha Trend tluk a ni hman. Mahse, kha boruak kha thla khat leka in lumlet thut thei a ni a, Party Worker mai ni lo, mipui phun leh ânna, beisei phak lohnaah hian "A la hma lutuk" tih hi chhuanlam eng ang mah ila, kan hla Key lak sân lutuk in a hun hma in a hring tih chian a ṭul ang. An lakah chuan kum khat pawh hi rei tak a ni thei. Intiamna Fair tak, inzawrhna awhawm zozai avang khan. An sawisel thei lovang.
Adviser 5 ṭhawt mamawh CM hian "Kan sum dinhmun enin" tiin emaw, "Ka tawn hriat leh ram ka veinaah hetiang tiang Adviser ka mamawh lo" ti ngam khawp a a hminga Adviser neih loh tawp aia pahnih khat Adviser a nei ngam tikah huaisen taka ṭan tlakah puan chi a ni chauh ang. Heti hi chuan mahni ngawta kal ngam lo, a ngaihna tak tak lo hre hlawl lo, Advise mamawh ngawih ngawih, kil 5 aṭanga Advice ngai CM hrawnah kan in ngai.
Ka sawi tawh ang khan an ngeng a chhun lo zawm zel a nih chuan Adviser to CM - Soil te, Adviser to CM - Forest te nei thliah thluah sela, "An nih nih ni teh se" tiin ṭah nuih pur chungin kum 4 lo awm tur hi kan thlir pui a niang chu !!
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: