Home minister-in tualthihnaa rinhlelh man a nih tawh thu sawi; thiltisualtu-in thiam loh a chan theih nana Police thawhpui turin mipui sawm

Aizawl | March 17, 2024: Home Minister K Sapdanga chuan, vawiin tlai dar 4 khan Aizawl SP Conference Hall-ah thuthar thehdarhtute hmaah, V Lalhmingthangi thihnaa rinhlelh man a nih tawh thu a sawi.

Home Minister chuan, Thiltisualtu in thiamloh a chan ngei theih nan mipuiten theih tawp a Police-te hnuchuina min pui turin kan insawm, a ti.

Home Minister chuan, "Tukin ni 17.3.2024 khan Pu Zothanmawia (64) Tuikual South veng chuan Aizawl Police Station-ah a nupui Pi V Lalhmingthangi, Aizawl New Market a VLH Variety Store neitu chu zan a a rawn haw loh report slam a turn laiin, a fapa in a nu Pi V Lalhmingthangi ruang chu a dawr chhungah thi in an hmuh thu a hrilh tih a sawi a.

Report dawn a nih velah hian Police leh Forensic team-te chu, ruang awmna dawrah kal ngalin,ngawrh takin hnu chhui tan nghal a ni a. A hmun a thil awmdan leh he thil thleng chhungchanga thu hriat nei awm angte statement atangin Police team hrang hrang insem darh chuan a titu ni ngei a rinhlelh Irene Lallawmzuali (34) W/o Lallungmuana, Ramthar North a cheng mek chu Zemabawk Dinthar veng a a thiannu in atang man nghal a ni." a ti.

K Sapdanga chuan, "Kan mi rinhlelh man kut atang hian tualthahna atan a hman ni ngei a lang, chemte leh tualthi ta thil neih ni ngei a lang engemawzat man tel a ni bawk. Kan mi rinhlelh in Police hma a a thusawi atang chuan ama tih ngei ni in a lang." a ti a.

"Pi V Lalhmingthangi ruang hi postmortem fel tawh a ni a, hnu chhui tur tam tak la awmte pawh, a tahtawl a, uluk tak a chhui zui leh vek tur a ni." a ti bawk.

Home Minister K Sapdanga chuan, "Thiltisualtu in thiamloh a chan ngei theih nan mipuiten theih tawp a Police-te hnuchuina min pui turin kan insawm a, hnuchuina ti thuanawp thei tur thil tilo turin kan in ngen a ni. Aizawl PS-ah Case No 87/24 Dt 17.03.2024 u/s 302/201/380 IPC siam a ni." tiin a sawi.