Court-in Sujata Chakma Kum li tang tur leh nuai 12 chawi turin hrem!

Aizawl | March 18, 2024: Court of Special Judges chuan vawiin khan hlemhletnaa inhnamhnawih Sujata Chakma hremna a puang a, kum li (4) chhung lungin a tang tur leh cheng nuai sawm pahnih (12) a chawi turinn a hrem a. A pawisa chawi tur hi a pe thei lo a nih chuan kum ruk (6) chhung lungin tan in a tlak ang.

S.R. (PCA) No. 02 of 2023

Ref. ACB PS Case No. 2/2021 Dt. 14.04.2021

u/s 409/420 r/w 120 B IPC and u/s 13 (2) r/w 13 (1) (a), (b) of PC Act, 1988

Dt. 15/3/2024 a thiam loh a chantir tak Pi Sujata Chakma W/o Buddha Lila Chakma chu a hnuai a mi ang hian vawiin dt. 18/3/2024 khan court in hremna a pe.

Section 409 r/w 120B of IPC angin kum li (4) chhung lungin a tang anga, pawisa cheng nuai li (₹ 4 lakhs) a chawi bawk ang, pawisa chawi tur hi a neih loh chuan kum hnih (2) lungin tan in a tlak ang.

Section 420 r/w 120B of IPC angin kum li (4) chhung lungin a tang anga, pawisa cheng nuai li (₹ 4 lakhs) a chawi bawk ang, pawisa chawi tur hi a neih loh chuan kum hnih (2) lungin tan in a tlak ang.

Section 13 (2) r/w 13 (1) (c) & (d) of PC Act, 1988 and r/w 120B of IPC angin kum li (4) chhung lungin a tang anga, pawisa cheng nuai li (₹ 4 lakhs) a chawi bawk ang, pawisa chawi tur hi a neih loh chuan kum hnih (2) lungin tan in a tlak ang.

A lungin tan hunchhung tur hi kalkawp tur a ni a. Tichuan, kum li (4) chhung lungin a tang anga, cheng nuai sawm pahnih (12) a chawi bawk ang, a pawisa chawi tur hi a pe thei lo a nih chuan kum ruk (6) chhung lungin tan in a tlak ang.

A thu kimchang:

Kum 2012 khan 13th Finance Commission chuan CADC Session Hall sakna a tan cheng nuai 300 (300 lakhs) a ruahman a, he cheng nuai 300 ruahman ah hian cheng nuai 232 hi Mizoram sawrkar in CADC kutah a pe a ni.

CADC chuan Pu RV Hluna, Edenthar Veng, Aizawl chu ₹ 2,50,63,138/- hmanga he hna hi thawk turin dated 14th March 2013 khan inremna an siampui a, he hna hi Dt. 14th March 2015 a thawk zo tura inremna hi siam a ni bawk.

Tichuan, contractor Pu RV Hluna hian hna thawk tan in, second Installment pawisa dawn a nih hma deuh in chutih hunlaia CADC a Chief Executive Member Pu Buddha Lila Chakma chuan he hna hi contractor Pu RV Hluna hnen atanga chhuh sakin a nupui Pi Sujata Chakma chu inremna ‘Power of Attorney’ (Deed of Agreement) hmangin a thawh chhunzawm tir a, court-a thuhretute thusawi atanga tarlan a nih dan chuan Pu Buddha Lila Chakma hian contractor hnenah hian harsatna hrang hrang siam lui in, dan anga a thawh tur ang bak pawh a thuneihna hmang sual in thawh luih tir a tum thin a, contractor Pu RV Hluna pawh hian Pu Buddha Lila Chakma nupui Pi Sujata Chakma hnenah hna hi pe lo thei lo dinhmun ah a ding ta a ni.

Vanduaithlak takin Pu Buddha Lila Chakma hi a thubuai ngaihtuah laiin dt. 10/10/2023 khan a boral hlauh mai a, a nupui Pi Sujata Chakma thubuai chauh hi ngaihtuah zui a ni ta a ni.

Tichuan, hemi thubuai ah hian Pi Sujata Chakma hi a pasal Pu Buddha Lila Chakma nena inthurualin thiam lohna a nei ve em tih hi ngaihtuah tur ber chu a ni ta a ni.

Contractor Pu RV Hluna pawh hian Prosecution lam thuhretu zing ami anih angin Pi Sujata Chakma hian a hnathawh a chawlhsan avanga Lawngtlai DC in a hnathawh tawh 40% bak chhunzawm leh tura a hriattir avangin Pi Sujata Chakma hnenah hian Legal notice a pek mai bakah Civil thubuai in Lawngtlai-a Civil Judge (Senior Division) Court ah a khin hial thu a sawi a. Tin, Prosecution lam thuhretu Pu Jayan Chakma, hemi hna viltu Executive Engineer (EE), PWD, CADC pawh hian Pi Sujata Chakma hnenah ₹ 27,60,000/- an pek thu a sawi a. Pu K. Kamal Chakma, Asst. Engineer, PWD, CADC pawh hi Prosecution lam thuhretu dang atan thu zawhfiah a nih angin Second Running Bill atangin ₹ 21,00,000/- leh third running bill atangin ₹ 27,60,000/- chu Executive Secretary in a tirh angin Pi Sujata Chakma hnena a pek thu a sawi a, chuta tan chuan ₹ 21,00,000/- chung thu ah Pu Buddha Lila Chakma hnen atangin pawisa dawnna Receipt a lak thu leh Pi Sujata chakma hnen atangin dt. 16.8.2015 khan ₹ 27,60,000/- chung thu ah Pawisa dawnna Receipt a lak thu a sawi bawk. Tin, Pu Buddha Lila Chakma leh Pi Sujata Chakma te hi nupa niin inkhata cheng an ni a, a pasal Pu Buddha Lila Chakma chu CEM, CADC a nihna angin aruahman leh thutlukna siam a ni ngei ang tih a pawmawm viau laiin Pi Sujata Chakma hminga Power of Attorney (Deed of Agreement) siam te, contract hnathawh te leh pawisa dawn te hi a pasal Pu Buddha Lila Chakma nen inthuruala dan bawhchhia an ni tih hi finfiah ngei a ni. Tin, Pi Sujata Chakma hi lehkhathiam (Graduate) niin CADC ah pawh Assistant hna thawk mek a ni bawk a, thu haw lam leh kal lam chu hre fiah ngei tura ngaih a ni.

Mizoram Lokayukta (ACB) lam te hian court-a an finfiah dan chuan he CADC Session Hall sak hna hi Pi Sujata Chakma leh a pasal Pu Buddha Lila Chakma te hian an chawlh san chawp chilh mai a, chutihlaiin Pi Sujata Chakma hian pawisa hi tum hnih dawngin a vaiin ₹ 48,60,000/- zet a dawng thung.

Executive Secretary, CADC in pawisa a la kawl zah hi ₹ 38,40,000/- a ni a, hei hi CADC in pawimawh ah an lo hmang a, 1st Installment-a sum dawn atang hian CADC hian Project etc. siamna atan ₹ 26,01,415/- hi an lo hmang tawh bawk.

13th Finance Commission sum ruahman zawng zawng hi cheng nuai zathum (₹ 300 lakhs) a ni a, CADC-a sum pekchhuah bak cheng nuai 68 (₹ 68 lakhs) hi hman loh in a lapse thung a ni.

Mizoram sawrkar-a PWD ten CADC Session Hall sak sa, a pum a senso an chhutna hi ₹ 87,92,000/- a lo ni ta a, Pu RV Hluna hian a hnathawh laiin he CADC Session Hall sak hna hi za zela 40 (40%) zet a lo zo tawh tih finfiah a ni bawk. Pu RV Hluna leh Pi Sujata Chakma te kuta pawisa pekchhuah zawng zawng hi ₹ 167,58,585/- a ni a. Tichuan, he pawisa pekchhuah zawng zawng atanga CADC Session Hall sak tawhna senso ₹ 87,92,000/- hi kan paih leh chuan ₹ 79,66,585/- zet a lo ni ta a, heta tang hian Pu RV Hluna insakna bungraw chhek sa senso a chhut ₹ 45,00,000/- hi kan paih leh chuan ₹ 34,66,585/- hi a lo berah Pi Sujata Chakma leh a pasal Pu Buddha Lila Chakma te sum eiruk chu a lo ni leh ang.

Chutihlaiin, Pu RV Hluna hnathawh leh sum dawn ho hi a in mil tawk hle a finfiah a ni bawk, chungte chu:-

A building sakna sum senso a chhut ₹ 77,23,000/-

A bungraw chhek khawm sa man ₹ 45,00,000/-

Belhkhawm ₹ 122,23,000/-

A taka pawisa a dawn zah ₹ 118,98,585/-

A chunga mite avang hian court hian Pi Sujata Chakma W/o Buddha Lila Chakma hi section 409/420 r/w 120 B IPC leh section 13 (2) r/w 13 (1) (c) & (d) of PC Act, 1988/120B IPC ang hian thiam loh chantir a ni. Chutihlaiin, Pu Buddha Lila Chakma hi tahrik ni 10/10/2023 khan a boral tak avangin he dan bawhchhiatna ah hian a meizang hlap tu zawk a ni nachung in hrem theih a ni ve ta lo a ni.

Thiamloh chan tir (Convict) a nih avangin Pi Sujata Chakma hi Bail-a a lo chhuah tawhna chu sut (Cancel) niin lungin ah dah luh nghal tur a ni bawk.

Court thuremna ah hian “Kan nitin nun min nghawng mek tu hlemhletna hi eng kawng emaw takin (i) rethei te retheihna thlen tu (ii) mipat hmeichhiat hman khaw lohna ti hluar tu (iii) min ti hnufum tu (iv) ruihhlo tawlhrukna hring tu (v) mihring hmanga sumdawnna thlen tu leh uchuak taka thil man ti pung tu a ni a. Chutihlaiin, hlemhletna hi a inhnamhnawih te hian an tuar nasa ber thin bawk a, tun tumah pawh hian hmeithai pakhat kum tlinglo fa pahnih enkawl mek tu chu lainatawm takin lungin atan phah a ngai dawn a ni. Chuvang chuan mitinin kan tih makmawh chu hlemhletna awm lohna nunphung leh hlemhletna laka fihlim inrelbawlna nei tura theih tawp chhuah hi a ni” tia tarlan tel a ni bawk.

Tin, PWD te hnathawhna kaihhruaina ‘Central PWD Manual’ hnuaiah hian hnathawktu Contractor hian hna petu (Tender Accepting authority) phalna in a Contractor Class pui emaw a ni aia Class sang hnenah chauh contract hna hi a hlan chhawng thei a, contractor nilo hnena hna hlanchhawn hi phal a ni lo thung. Mizoram Sawrkar Department dangte tana kaihhruaina Mizoram Transparency in Public Procurement Act, 2008 leh Mizoram Transparency in Public Procurement Rules, 2000 ah phei chuan hetianga contract hna midang hnena inhlanchhawnna (Hralhchhawnna) tur dan hi a awm hauh lo a ni tiin court hian a sawi lang tel bawk.