Aizawl | March 18, 2024: Vawiin khan ZPM General Headquarters chhung inkhawmah Chief Minister Pu Lalduhoma chuan thu sawiin,”Kan hma lawka MP inthlan lo awm turah ZPM Party-in candidate atan Pu Richard Vanlalhmangaiha a ruat hi lawmawm ka ti a, ani hi thlahtu chhui dawl tak, Pi leh pu atanga renga ramhruaitu, Dr.Rosiama(L) District Council Chairman hmasa ber leh Pi L.Thanmawii(L) Mizo zinga hmeichhe MLA hmasa ber te tupa a ni a, tin a pa hi Pu Lalzawma (Wing Comander retired) niin chhungkaw belh chian dawl tak atanga MP candidate kan nei hi kan vannei hle a ni. Tin thiamna lamah pawh B.Com niin English leh Hindi thiam tak a ni.
Mizoramin MP fel tak tak kan lo nei tawh thin a, chutih laiin tawng lama harsatna nei Parliament house chhunga kha chih tlat te Central Minister-te dawr kawnga harsatna neite pawh kan lo awm tawh thin a ni. Chutiang ngaihtuah chuan Pu Richard-a hi MP tha tak a nih ka beisei a, kohhran leh khawtlanga a inhmannate hi a chhuanawmin, ram rawngbawlna kawngah pawh theih tawpa ke pen tur mi leh Budget piah lama, Central sorkar hnuaia scheme tha tak tak hai chhuak thei turin kan ring tawk a ni. Tin ZPM hi tualto Party kan nih angin vanneihna bik kan nei a, central sawrkarah zawm bik kan neih loh avangin tuman kan kut min phuar sak ve dawn lo, a thu a zira Central sawrkar thlawp thei tu leh dodal theitu party kan ni a, hei vang hian Central sawrkar pawhin min ngai pawimawha, vawiin thleng hian min thawhpui tha em em a ni. Chuvangin Mizoram mipui min tawngtaipui thin tute pawhin thahnem ngai taka kan MP candidate min vote pui theuh turin kan sawm cheu a, ruling party mi ngei MP kan neih chuan Mizoram sawrkar nen pawh hmasawnna kawngah thawhho a nuamin thil tih a awlsam hle dawn a ni,” a ti.
Chief Minister Pu Lalduhoma chuan sawrkar hmasa hnuaia contract hna thawh chungchang sawiin,”Hna zawh hun tawh, la zawh loh tam tak a awm a, tin hna thenkhat contract semsawm lutuk avanga hna chhe tak tak hmuh tur a awm nual bawk. Heng hna thalo te pho chhuaka thuneitute beng a thlen theih nana min thawhpui zel turin mipui leh NGO te kan sawm a ni, tun hnaia video viral chungchangah pawh Vaisam YMA hruaitu pakhat thahnemngaihna zarah thuneitute beng a lo thlenga a chungah pawh kan lawm hle a ni,”a ti.
Pu Lalthansanga, Minister EF & CC etc. pawhin thu sawiin, “Pathianin Mizoram Chief Minister atan Pu Lalduhoma min pe hi a lawmawm ka ti a, New Delhi-a, a zin hmasak ber tum pawh khan Nationalism chungchangah huai takin a tawng a, ZPM Party in Nationalism-ah a taka che a, Mizo Hnam leh Mipuite tan huai taka ke a pen dawn thu a sawite khan rilru a ti thlamuangin, thu, a taka chantir hlan a nghahhlehawm tak meuh a ni. ZPM chu Pathian ruat party leh vawiin thlenga Pathianin a hruai kan ni a, Party First Me Second titu kan nih a pawimawh hle, kan hnam din chhuahna turin nationalism leh economic self-sufficiency tankawp tir thiam a pawimawh hle a, DAH ti puitlinga ram leh hnam intodelh ni tura tan kan lak a hun ta hle a ni”, a ti.
Vawiin ZPM Party chhung inkhawm hi Pu VL.Zaithanzama, MLA, Vice President ZPM General Headquarters-in a kaihruai a, Pu Vanlalhruaia Adviser-in hunserh a hmang a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: