ZPM Aizawl North I Blockin sawrkar thar lawm; inthlan hmaa kan thusawite a taka chantirtu tur kan ni a, kan taihmak leh zual a ngai

Aizawl | February 3, 2024: Vawiin ni 3 February 2024 (Inrinni) hian Vety Rest House, Selesihah ZPM Aizawl North I Block buatsaihin Sawrkar thar lawmna leh Bialtu MLA chawimawina hun hman a ni a, he hun hi Pu Lalduhoma, Chief Minister-in a hmanpui.

Pu Lalduhoma, Chief Minister chuan thusawiin, "Kan campaign lai khan kan party worker-te an thawkrim ber tih hi kan pawm tlang a, kan chakna hi party mal chakna ni lovin mipui chakna a ni. Ram mipui nawlpuiten ram roreltu an thlang a neutral te hi an pawimawh em em a, neutral kan tam poh leh kan ram hian a ṭhatpui dawn a ni," a ti a. "Tunah hian kalphung thar mipui sawrkara a key pawimawh ber PWD department changtu bialtu MLA Aizawl North I mipuiten in nei a, kan Minister hi kan thla a timuang em em a ni. A bul kan tan chho chauh a ni a, mipui mimirah leh sawrkar hnathawkah a tha lam duhna a lo lian zel a, a lawmawm em em a ni. A tha zawngin kan rilru a insiam zel niin kan hria a, Zoram thar kan hnaih zel niin kan hria a, a siamthatu ni zel turin kan inchah duh a ni," a ti bawk.

Chief Minister chuan, "Kan sawrkar hma ai khan kan sawrkar hnu hian mipui hian kan lakah hian an beiseina an nei sang zel niin kan hria a, inthlan hmaa kan thusawite a taka chantirtu tur kan ni a, kan taihmak leh zual a ngai a ni. Ni 100 chhunga tih tur kan ruahmante pawh kan tihlawhtling chho zel a, mipuite a bikin kan thalaite mahni ke a ding thei leh chhuangkaw intodelh a tam thei ang ber siam kan tum a, tupawh lo sawrkar se mahnia intodelha dingchhuak thei tura siam hi kan tum a ni," a ti a. "Taihmakna leh rinawmna hmanga hausak hi a tlo ber a, Pathian duh dan pawh a ni. Pathian malsawm tlaka hna thawk tur leh kan ram tana hnathawk zel turin kan in chah duh a ni," a ti bawk.

Pu Vanlalhlana PWD Minister, Aizawl North I bialtu MLA ni bawk pawhin thusawiin, "Kan campaign laiin hlim takin kan campaign a, kan thawhrim rah kan seng ta a, kan zavai a kan thawhrim rah a ni. Kan bial chhungah polling station zawng zawngah hnehna kan chang a, a lawmawm em em a, he hnehna hi kan zavaia ta a ni. MLA te chu mipui aiawh a ding mai kan ni a, a hlawhtlinna erawh chu mipui ta a ni. Ram tan ke kan pen ho zel ang a, mipuiin min beiseina a sang hle a, tih tur hmachhawp pawh kan ngah em em a ni. Famkim lo mihring ve tho kan ni a, ṭawngṭainaah min hrereng turin ka chah duh che u a ni," a ti bawk.

Baryl Vanneihsangi Tlau, Aizawl South III bialtu MLA pawhin thusawiin, "Kan nitin nunah entur dik, ngaihsak tur dik kan thinlungah awm se la, ZPM hian thlei bik nei lo mipui sawrkar kan aupui a, min tihhlawhtlintir theitu chu Pathian leh mipuite an ni," a ti a. "Isua kan en chhung chuan Pathianin min hruai zel dawn a ni. Mihring thiamna ten chintawk a nei thin a, mahse entur dik kan en a, vawn tur dik kan vawn tlat chuan kan ram hian Pathian malsawmna a dawng zel dawn a ni," a ti bawk.

He hun hi Pu Lalthanruma, Block President-in a kaihruai a, Pastor JH Zaikima, Leitan in hunserh a hmang. Pu Haukhum Hauzel (IAS Rtd) Chairman, Resource and Mobilisation Department-in he hun hi a hmanpui a, Pu JK Dawngzuala, Chairman, ZIDCO, Pu Lalthazuala Rawite, Chairman, MIFCO leh General Headquarters atangin party hruaitu engemawzatin an hmanpui bawk a ni.