Sorkar-in a ngaih pawimawh ber tur chu mi rethei leh chanhaite an ni a, sorkar policy pawh mi retheite tapchhak thleng phak a ni ngei ngei tur a ni

Aizawl | Feb 7, 2024: February 7, 2024 Nilaini chhun khan Dr. Lalmalsawma Nghaka, Treasurer MPCC chuan Hachek Constituency a tlawh a, Congress party hruaitute nen inkawm hona hun Pu Chawngthanhranga, Kawrtethawveng Hachhek South Block President Inah an nei.

MPCC Treasurer chuan, Sorkar-in a ngaih pawimawh ber tur chu mi rethei leh chanhaite an ni a, sorkar policy pawh mi retheite tapchhak thleng phak a ni ngei ngei tur a ni, a ti.

Khawthlang mite zingah huan lo ram hmanga ei zawng an pung zel a, kum tin lo vah bansan a, huan hmun nghet kan neih zel hi ram economy than nan a tul a ti a.

Sakhaw zalenna a pawimawh em em a, India rama Zo hnahthlak Kristiante kan dinchhuah nana thil pawimawh ber chu sakhaw zalenna kan neih zel hi a ni. BJP hi an lian tulh tulh a, ‘one nation, one religion’ dan an kalpui mai a hlauhawm a, chutiang hun a thlen lohnan tawngtaina nen Pathian hnenah nasa taka kan dil a ngai a. Central-ah BJP bawk an sorkar leh chuan nekchepin kan awm tawh dawn a, ei leh bar zawn kawng thlengin tun ai hian kan hniam zawk dawn a ni tih hi mi zawng zawngin kan hriat a ngai hle tawh a ni a ti.

Kum 2023 MLA election-ah Congress party chuan hnehna a chang phak lo a, insiamthat a ngai, ram pumah Congress family hrin tam tak an awm a, chung mite chuan Congress a dinchhuah theih nan nasa takin ngaihtuahna an seng mek a, headquarters lam hruaitute’n hmun tina kan hotute thurawn ngaihthlak a, danglam ngam kan nih a ngai hle tawh a, mirethei ten kawl eng an hmuh theih nana hna thawk thin chu Congress party a ni.