Aizawl | Feb 7, 2024: MZP chuan tukin khan Rangvamuala zirna in ṭhenkhat an tlawh a. Feb 10 ral hmaa zirlaite harsatna sukianga hma la turin an phut.
Mizo Zirlai Pawl (MZP) General Headquarters chuan tukin khan tunhnaia Social Media lama lo lang, Govt. Nepali Primary School Rangvamual a zirlaite School kawta class an lak chungchang enfiahin a hmunah a tlawh a. An harsatna leh an dinhmunte a zirchiang nghal.
Govt. Nepali Primary School, Rangvamual-ah hian zirlai Nursery - 30, K.G - 22, Class I - 27, Class II - 19, Class III - 16, Class IV - 13 awm mekin an vaiin zirlai 127 an awm mek a, Zirtirtu a nghet- 2 (pahnih), MR zirtirtu pakhat leh SEDP zirtirtu pakhat an nei mek a ni.
Govt. Nepali Primary School Rangvamual hi an building a tet em avangin, zirlai tam zawkin sikul chhung an chang lova, pawn ni sensa hnuaiah class an la thin a ni. Zirtirtute pawhin awmna tur an neih loh avangin chaw chhumna (kitchen)-ah an thu a, chuti chung chuan zirna hi an kalpui naw naw a ni.
MZP Branch Rangvamual chuan tun hma atangin thuneitute hnenah, Govt. Nepali Primary School Rangvamual hi ngaihsak turin a lo ngen tawh thin a. Tunlai ram changkang tawh, Computer age a cheng tawha kan in ngaih laia, kan ram chhung ngei, Aizawl Minicipal Coorporation (AMC) huam chhungah hetianga sawrkar sikul dinhmun chhe lutuk leh ngaihthah a la awm fo hi MZP chuan mak a tiin, pawi a ti takzet a. World Class education kan sawi tawh laia zirnain ngaihsak a hlawh tak tak loh zia tarlangtuah MZP chuan a ngai a ni.
MZP chuan nisa leh ruahsur hnuaia zirna kalpui hi engti kawng mahin a remti lova, tun kar chhung (February 10 ral hma) ngeia sawrkarin zirlaite harsatna sukiang tura immediate action a la lo a nih chuan, a tul angin hma a la dawn a ni. Heng kan zirlai puite’n nisa leh ruah sur hnuaia lehkha an zir avanga an hriselnain a tuar a nih chuan, sawrkarin mawh a phur ang.
MZP General Headquarters hruaitute hian, Rangvamuala Govt. Primary School leh Govt. Middle School-te pawh a tlawh nghal a. Govt. Middle School hi an building a tlabal tawh hle a, zirlaite tan pawh a him tawh lo niin a hria a, a rang lama ngaihsak turin sawrkar thuneitute kan ngen nghal a ni.
MZP General Headquarters hruaitute hi MZP Branch Rangvamual hruaituten an tawiawm a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: