MZP-in Zofate Chawlhbuk tlawh; Chakma hel pawl training camp titawp tura hmala turin Central Young Chakma Association hriattir

Aizawl | Feb 14, 2024: MZP General Headquarters chuan Borapansury CADC chhung, Lawngtlai District-a Zofate Chawlhbuk a tlawh a. Chawlhbuk leh a chhehvel sam fai niin, Central Young Chakma Association hruaitute nen an inkaw nghal a. MZP hi an Vice President C Lalremruata hoin hruaitu eng emaw zat an kal.

MZP chuan nimin ni 13 February, 2024 khan Chawngteah MZP Sub Headquarters Chawngte buatsaih zirlai titha chawimawina an hmanpui zawhah, Central Young Chakma Association (CYCA) hruaitute nen MZP Sub Headquarters Chawngte Pisa-ah an inkawm a. MZP hruaitute chuan Bangladesh atanga Chakma foreigner dan loa lo lut tam lutuk dang turin CYCA-in hmala turin a hrilh a, Chakma Mizoram chunga awmsate tan pawh thil pawi tak a la nih dawn avangin Chakma illegal Immigrant-te chak taka dang turin CYCA hrilh an ni.

MZP chuan, Central Young Chakma Association hruaitute chu, Mizoram chhunga Chakma hel pawl (PCJSS) te training camp Lunglei leh Mamit district chhung hmun 8 a awmte titawp tura hmala turin a hriattîr nghal a. Mizoram chhungah Chakma hel training camp awmte a rang thei ang bera an titawp lo a nih chuan MZP-in hma a la dawn a, chumi hmaa CYCA ten hma la turin hrilh an ni.

MZP chuan kum 2014 khan Borapansury-ah Zofate Chawlhbuk a sa a, ram venhimna atan leh CADC hi Mizoram chhung ngei a ni tih lantir nana sak niin, Mizo zin veivakte tan a tangkai thin hle a. A ram hi a ṭhenawm ramten a nek a a lan avangin, teh that a ni a. Young Chakma Association Borapansury Zone hruaiten a hmunah an enpui.

MZP General Headquarters hruaitute hi MZP Headquarter Lunglei hruaitute leh MZP Sub Headquarters Chawngte hruaituten an tawiawm a ni.