MZP-in Sikul Hulhliap zar hnatlang a ko

Aizawl | Feb 10, 2024: Mizo Zirlai Pawl (MZP) General Headquarters, Aizawl chuan Thawhṭanni hian Sikul Hulhliap zar hnatlang a ko.

Vawiin February 10, 2024 (Inrinni) chawhnu dar 2:00 khan MZP General Headquarters, Emergency Meeting MZP Pisa Pui, AizAwl-ah neih a ni a, Rangvamual-a Govt. Nepali Primary School zirlaite sikul kawt tuala zirna an kalpui chungchanga hmalak zel dan tur a rel.

Govt. Nepali Primary School zirlaite class room indaih lohna avanga, hun rei tak sikul kawt tuala class an lak avang leh MZP Branch Rangvamual-in hun rei tak ata hma a lo lak tawhnain ngaihsak a hlawh tawk loh avangin, MZP General Headquarters, Aizawl chuan ni 7 February, 2024 (Nilaini) khan a hmunah a tlawh a. Zirlaite ni sensa leh ruah sûr hnuaia class an kal hi pawi a ti a, ni 10 February, 2024 ral hma ngeia ruahmanna lailawk sawrkar thuneituten an siam lo a nih chuan MZP-in hma a lak tur thu a lo sawi tawh a. Meeting chuan, vawiin ni 10 February, 2024 (Inrinni) thlenga sawrkar hmalakna engmah hriat a nih loh avangin, karleh Thawhtanni (ni 12 February, 2024) hian Sikul hulhliap zar hnatlang a ko nghal a ni.

MZP chuan, Sikul hulhliap zar hnatlangah hian zirlaite hmakhaw ngaitu thahnem ngaite chu a tam thei ang ber thawkchhuak turin a ngen a ni.

Govt. Nepali Primary School, Rangvamual-ah hian zirlai 127 (Nursery - 30, K.G - 22, Class I - 27, Class II - 19, Class III - 16, Class IV - 13) an awm mek a, Zirtirtu a nghet- pahnih, MR zirtirtu pakhat leh SEDP zirtirtu pakhat an nei mek a ni.