MZP-in sikul hulhliap sak tum an ṭhulh!

Aizawl | Feb 11, 2024: MZP chuan Govt. Nepali Primary School, Rangvamual zirlaite class room indaih lohna avanga sikul kawta class an lak avanga sikul hulhliap sak an tum chu an ṭhulh rih.!

Tarlan tawh angkn, Govt. Nepali Primary School, Rangvamual zirlaite class room indaih lohna avanga sikul kawta class an lak chungchângah MZP chuan ruahmanna lailawk (immediate solution) siam vat turin Sawrkar a lo ngen tawh a. Hun tiam chhunga hmalakna a awm loh avangin naktuk ni 12 February, 2024 (Thawhṭanni) zingah Sikul sak hnatlang nei turin ruahmanna siam a ni.

Ruahmanna ngawrh taka kalpui a nih mek laiin, vawiin ni 11 February, 2024 (Pathianni) chawhnu dar 4 khan bialtu MLA Pu TBC Lalvenchhunga Adviser to Chief Minister (Finance) hoin Education Department Director leh MZP Office Bearers ten Govt. Nepali Primary School chungchang an sawiho a.

Sawrkar chuan, MZP ngenna angin naktuk ni 11 February, 2024 hian Govt. Nepali Primary School zirlaite chu Rangvamual Community Hall-ah an sawn nghal dawn a. Hetah hian sikul building thar sak zawh a nih hma chu an dah lailawk dawn a ni. Tin, Samagra leh hmun dang atangin cheng nuai 26 hmangin School Building thar an sa ṭan nghal dawn a. Hmalakna hi chak taka kalpui an tum thu Sawrkar hotuten an sawi bawk.

Hetiang hi sawrkar hmalak tum dan a nih avangin leh MZP ngenna tih hlawhtlin ngei an tum avangin, naktuk ni 12 February, 2024 (Thawhtanni) a Govt. Nepali Primary School sak hnatlang MZP-in a koh chu ṭhulh rih a ni a. Sawrkar hmalak dan MZP chuan uluk takin enzui a tum a ni.