Mizoram 6 Red Snooker Championship 2024 Champion Lalsangzela

Aizawl | Feb 17, 2024: Mizoram Snooker & Billiards Association (MSBA) buatsaih Mizoram 6 Red Snooker Championship Tournament 2024 chu zanin khan MSBA Hall, Hawla Indoor Stadium-ah final khelin a hmawr bawk a ni a, Lalsangzela, Khatla South chu a champion a ni.

Champion Lalsangzela (Kawr var ha) leh T Laltanpuia

Mizoram 6 Red Snooker Championship 2024 hi Lalsangzela leh T Laltanpuia, Upper Republic te'n tlai dar 6:00 atang khan final an khel dawn a. Race to 6 a khelh niin, zan dar 8:50 vel khan match zovin, Lalsangzela hi 6 - 2 in a chak ta a ni.

Lalsangzela'n theihtawp a chhuah; a tang hle!

Mizoram 6 Red Snooker Championship 2024 hi Feb 12 tlai atang khan khelh tan a ni a, Snooker table pali-ah a ruala khelh thin niin, tlai dar 4:30 atanga zan dar 9:00 thleng match a awm thin a ni. Mizoram 6 Red Snooker Championship 2024-ah hian Player 31 an tel a, Zaithangpuia, Siaha tih loh chu Aizawl khawpui mi vek an ni. Mizoram 6 Red Snooker Championship 2024 hi double elimination hmanga khelh a ni.

T Laltanpuia'n thelh a tum lo!

Feb 16 zan khan Semi final khelin, Lalsangzela'n K Lallawmkima chu 5 - 0 a hnehin final a inhlang kai a, T Laltanpuia leh Lalbiaksanga te inkhelhah 5 - 3 in T Laltanpuia a chak a ni. Semi final inkhel pawh hi a hmuhnawm a, boruak pawh a ṭang hle a. Final-ah Lalsangzela leh T Laltanpuia te hi an insu ta a ni.

Lalsangzela hi Mizoram Snooker & Billiards Association (MSBA) buatsaih 'Mizoram State 6 Red Snooker Ranking 2024' Jan 27, 2024 Inrinni-a zawh takah champion a lo ni tawh bawk a ni.