Meichher Award 2023 dawngtute hnenah chawimawina hlan

Aizawl | February 9, 2024: Adult Education Wing, Directorate of School Education buatsaihin vawiin chawhnu dar 1:00 khan Directorate of School Education Conference Hall, Aizawlah 'Meichher Award 2023' semna hun hman a ni. He hun hi School Education Minister Dr. Vanlalthlana chuan khuallian ni a hmanpuiin Education Department buatsaih thlakip chhuak Meichher chanchinbu a thu leh hla ziak tha (Meichher Best Article of the Year) leh thu leh hla thawh hlawk (Meichher Best Contributor of the Year) lawmman dawngtu 10 te hnenah chawimawina a hlan.

He hun hmanpuitu School Education Minister Dr. Vanlalthlana chuan bultan a nih atanga vawiin thlenga mei mit lova thlakip chhuak Meichher chanchinbu kalpui ngar ngar a ni chu ropui tiin, tun hun a thlen theih nana thahnemngai taka thawktute hmalakna fakawm a ti a. Meichher chu Mizoram tana finna tuikhur mitin thal phak a nih theih zel a beisei thu sawiin, thu leh hlate inngaih hlut leh inngaih pawimawh sak tawnna hian ziakmiteah phurna leh chona a pe thin a ni, a ti. Lawmman dawngtute taimakna leh inpekna chhuanawm tiin tawpsan mai lova midang tana rawngbawlna a ni tih hriaa theihtawp chhuah chhunzawm zel turin a fuih a. Meichher kalzelna kawnga thawhhlawk tak takte chawimawina hun buatsaih a ni chu finthlak tiin, Department hotute remhriatna fakawm a tih thu a sawi a. Hun bi bawhpelh lova Meichher chanchinbu chhuah a nih theih nana Editorial Board-te inpekna ropui a tih thu sawiin, Meichher kalzelna turah duhsakna a hlan a ni.

Vawiin a sem chhuah tak Meichher Award 2023 a chawimawina dawngtute hian Citation bakah pakhatnain pawisafai Rs. 3,000/-, pahnihnain Rs. 2,000/- leh pathumnain Rs. 1,000/- an dawng a. Meichher Award 2023 result kimchang chu hetiang hi a ni:

A. Meichher Best Article of the Year 2023:

Position     Name of Awardee          Address                     Name of Article

1st   Rev. V.L. Luaia Hranleh  Mission Veng, Aizawl   Kumpui sul leh kan nun

2nd Rev. P.C. Muanthanga Mission Vengthlang, Aizawl Aw, Bethlehem ka ngai a che

3rd  Pu Zalianthanga         Tahan         Ṭhian ṭha

 

B. Meichher Best Contributor of the Year 2023 :

Position         Name of Awardee         Address         No. of Contribution for Article

1st Pu Mahmuaka Chhakchhuak  Chanmari, Lunglei  6 Article

2nd Pu Familia Fanai Lalṭansanga Zotlang, Lunglei  4 Article

2nd Pu Thansanga Chawngthu Ramhlun Venglai, Aizawl 4 Article

2nd Pu Ramhluna Hnamte Zonuam, Aizawl 4 Article

3rd Pu R. Lalrawna Electric Veng, Aizawl  3 Article

Pu Rinfela Zadeng  Zobawk Venghlun, Lunglei 3 Article

Pu Zalianthanga  Tahan         3 Article

He hun hi Pu Lalsangliana, Director, School Education Department chuan kaihruaiin kalkhawmte lawmna thu a sawi a. Pi Zoliani Hnamte, Deputy Director-in hunserh hmangin Meichher Editor Pu T.C. Lalremsiama, Asst. Director, Adult Education Wing, Directorate of School Education hnen atangin report ngaihthlak a ni a. Prof. Rualkhuma Colney, Vice President, Mizo Academy of Letters (MAL), General Headquarters, Aizawlin endikna neih dan a sawifiah a. Mizo Writers Association (MWA) President Pu R. Lallianzuala, Chairman, Mizo Language Development Board leh lawmman dawngtute atangin thusawi ngaihthlak a ni bawk a. Pi Ng. Fanchun, Deputy Director, Adult Education, Directorate of School Education-in lawmthu a sawi hnuah hun hman hi khar a ni.

Thlakip chhuak chanchinbu 'Meichher' (Meichher Monthly Magazine) hi a tirah chuan 'Zoram Eng' tih hming pua chhuah a ni a; chu chu kum 48 emaw dawn liam ta kum 1975 March & April thla chhuak kha a bultanna a ni a. Tulna leh remchan zawkna avangin 'Zoram Eng' tih chu kum 1975 October thla chhuak atangin 'Meichher' ti a hming thlak a ni a. Kum 1975 March & April thla chhuak atanga chhiarin January 2024 a tihchhuah tiamin bu 791 tihchhuah tawh a ni a. Meichher hi sawrkar sum sengin a tir atangin thla tin bu 3,000 zela tihchhuah niin, a thlawna sem thin a ni a. Editorial Board hranpa neiin, School Education Director chu Meichher Publisher a ni.

Attachment