Larsap leh Rajya Sabha MP-in KMMTTP kawng sial mek chungchang leh thil pawimawh hrang hrang sawi dun

Aizawl | February 17, 2024: Tukin zing khan Rajya Sabha MP K Vanlalvena chuan Governor Dr Hari Babu Kambhampati chu Raj Bhavan-ah a hmu a. Mizoram tana thil pawimawh chi hrang hrang an sawi dun.

Governor leh Rajya Sabha MP te chuan Myanmar ram buainain a nghawng harsatna chi hrang hrangte an sawi dun a. Act East Policy hmanga Ministry of External Affairs Govt of India in a thawh mek Mizoram chhim lam atanga Bay of Bengal Tuifinriat kam khua Sittwe thleng tur KMMTTP Road project hna thawh mek in harsatna a tawh sutkian dan tur te pawh an sawi a. Mynamar kal tlanga Mizoram leh Thailand ram thlunzawm tur Zokhawthar to Maesot(Thailand) kawngpui siam mekin harsatna a tawh mekte sutkian a nih theih dan turte bakah Indo- Bangladesh border trade centre Tlabung- Kawrpuichhuah a din tur hna muang lutuk chungchang te an sawi dun bawk a. A tul dan anga Ministry of External Affairs Govt of India leh Ministry of Commerce and Industry ah thlen turin hmachhawp ah an dah a ni.

Mizoram Governor chuan Bairrabi to Sairang rel kawng siam mek chu lei dawh lai a chim avanga zawh hun tur a khawtlai phah pawi a tih thu te, KMMTTP road hna tihkhawtlai a ni chu pawi a tih thu te sawiin heng kawng pahnihte hi zawh a nih hunah chuan Mizoram mipuiten ei leh barah nasa takin hma an sawn phah a beisei thu a sawi bawk a ni.

Mizoram Governor leh Rajya Sabha MP te hian Myanmar border fencing siam tumna leh chumi kaihhnawih thil leh a nghawng theih te pawh an sawi dun bawk a ni.