". . . kan thlan fuh chuan Central-ah Mizopa ngei Union Minister kan nei thei . . "

Aizawl | Feb 12, 2024: BJP Mizoram chuan vawiin 12th February 2024 Monday hian karthar inhlanna leh Political Session hun neih niin, Pu Christopher Lun State Secretary in inkhawm akaihruaia, Pu Vanlalhmuaka State President in thusawina hun a nei a ni.

BJP Mizoram State President Pu Vanlalhmuaka chuan, "kum 2024 Lok Sabha election lo awm turah hian BJP sorkar Pu Modi-a kaihhruai chuan hne htakin sorkarna a siam leh dawn a. Kan state retheihna ata khaichhuaha a awm theihna atan leh Mizo mipuite'n tlangnel taka Central sorkar kan dawr ve theihna turin, Central sorkar ah Mizoram mipui aiawha kan MP-te thusawiin awmzia a neih theihna atan Kum 2024 Lok Sabha Election lo awm tur hi hmang ṭangkai turin Mizoram mipuite ka sawm a ni," a ti.

Pu Hmuaka chuan, "Mizoram hian kan thlan fuh chuan Central-ah Mizopa ngei Union Minister kan nei thei a, Mizo mipuite hian he Election lo awm tur hi hmang ṭangkai turin ka sawm bawk che u a ni. Mizoram hian MP Lok Sabha leh Rajya Sabha ah fel tak tak, State-a rulling party atangin kan lo theh chhuak tawh ṭhin a, Central-ah an thusawiin awmzia a nei mawh hle. Tun ṭum Lok Sabha Election lo awm tur chu kan state sorkarna chelhtute tun aia Pu Modi-a sorkarah an lo tlangnel zawk a, Mizoram mamawh hrang hrang Central a an zu sawi te awmze neia lo umzuipuitu tura, State sorkar sum harsatna ata chhanchhuah theihna turin, Aigupta buhzem bula Kannan fate'n an duh tawk leh mamawh tawk buh lo petu tur Josefa- BJP Lok Sabha MP thlang tura inbuatsaih turin Mizoram mipuite ka sawm bawk a ni," a ti.

Pu Hmuaka chuan sawi chhunzawmin, "MLA General Election-2023 ah khan BJP chu Mizoram hian hnawl tawh mahse, Lok Sabha election lo awm turah chuan Pu Modi-a team a tel ngei tur BJP MP thlang tura inbuatsaih a ṭul takzet a ni," a ti bawk.

Inkhawm ah hian Pu Vanupa Zathang IPS (Retd) State Vice President, Pi Lalremsangi Fanai State Spokesperson te bakah member dangten thusawina hun an nei bawk a ni.