India ram ke a kalchhuah tum Krishna Nayaka-in Aizawl lo thleng

Aizawl | Feb 9, 2024: India ram ke a kalchhuah tum Karnataka Mysuru mi Kum 31-a upa Krishna Nayaka hian ramchhung state hrang hrang leh rampawn hmun thenkhat a Yoga ngaihdan diklo tak hrilhfiah tur leh a thatna te mipui te hrilhhriat annih theih nan ke in state hrang hrang a tlawh kual a, hei bakah hian sik leh sa in thlak danglam nasat tawh zia hrilhfiah tur leh thing leh mau pawimawh zia te a kalna state hrang hrang zirlai te hnenah a sawi kual thin thu a sawi.

Krishna Nayaka hian YOGA hi Hindu sakhua zirtirna pakhatah mi tam tak in an ngaih chu thil diklo leh belhchian dawllo a ti a, Yoga chu technology pakhat, mi tam takin kan la hman thiamloh, hriselna mai bakah natna khirh tak te pawhin an dampui theih khawpa thil tha a ni a ti a, amah ngei pawhin a dampui thu a sawi a, a kalna state hrang hrang-ah sikul leh college zirlai te hnenah a thatna te hrilh kualin, thingphun uar turin a fuih zel a, amah ngeiin thing te pawh a phun zel thu a sawi tel bawk. Krishna Nayaka hian New Delhi a naute piang tir ten chuap cancer natna an vei nghal te chu a ngawihmawh thu sawiin, ram chhung state hrang hrang-ah boruak chhiat nasat tawh avang leh kan nitin nundan inthlak nasat tawh avangin natna hrang hrang kan vei mek a, yoga nihna diktak hriaa zirchiang tur leh thingphun uar theuh turin mipui te a chah nghal bawk. Krishna Nayaka hian kum 1 leh thla 4 chhungin km 11000 a kal chhuak tawh a, India ramchhung chu nakum 2025-ah a fan chhuah a beisei thu a sawi.

Krishna Nayaka hian ramchhung state hrang hrang bakah Nepal leh Bhutan a tlawh tawh a, February ni 2 khan Mizoram lo thleng in, nimin khan Aizawl a thlen thu a sawi. Govt. Johnson College leh Govt. Aizawl College te a tlawh a, Mizoram hi state 16 a tlawhna niin, Silchar atangin Manipur a pan leh dawn a ni.