CM Lalduhoma'n 'His Majesty's Headhunter' lehkhabu tlangzarh

CM Lalduhoma'n Nagaland MLA leh BJP hruaitu M Kikon lehkhabu a tlangzarh

Aizawl | February 16, 2024: Vawiin khan Mizoram University Conference Hall-ah Chief Minister Lalduhoma chuan Nagaland MLA leh BJP hruaitu Mmhonlumo Kikon lehkhabu "His Majesty's Headhunter - the siege of Kohima that shaped world history" tih chu Mizoram pualin a tlangzarh.

Thusawiin Chief Minister chuan, Indopui pahnihna hun laia thil thleng, June 1944 a Kohima hualbehna leh chhanchhuahna chanchin ziahna lehkhabu hi a ngaihnawm hle a, Mizote tan pawh chhinchhiahtlak a ni. Mizo tlangval engemawzat an tel ve a, kan Finance Minister ni ta Pu J. Lalsangzuala te pawh kha an tel a, nunna chan ta te zingah Pu Lalbuaia Lushai te pawh an tel a ni. Kha thil thleng khan khawvelah nghawng a neih len em avangin ziaktu thenkhat chuan "Stalingard of the east" te pawh an ti hial a. Japan ral lian kaltluang lai an tawlhkir leha bulpui pakhata ngaih a ni. He indonaa kan unau Naga te huaisenzia leh an ram leh hnam chhan tura an inpekna ropuizia te chu a entawntlak hle, a ti a. A ziaktu Pu Mmhonlumo Kikon inpekna fakin, zirlaite leh history chikmite tan a hlu hle dawn a, chhiar nahawm tak a ni, a ti bawk.

Mnhonlumo Kikon pawhin thusawiin, Chief Minister chungah lawmthu a sawi a, he lehkhabu hian tunhmaa India hmarchhaka Indopui pahnihna chanchin a tarlang a, tun hnuah state hrang te kan lo awm tak thliah thliah avangin Nagaland a thil thleng a ang ta mai a ni. British ten min awp lai khan helai vela cheng hote hming leh hmun hmingte anmahni lam thiam zawngin an phuah fova, keinin kan lo chhawm a, thil tam tak kan hriat fuh loh phah zui a ni. Tunah chuan keimahni ngeiin kan history te kan hmuh dan dik kan phochhuah ve a hun tawh a. He lehkhabuah hian chu chu a tum lian ber pakhat a ni, tiin lehkhabu a siam chhan te a sawi a ni.

Lehkhabu tlangzarhna inkhawm hi Dr. B. Lalzarliana'n a kaihruai a, Prof. Ngurliana Sailo chuan lehkhabu chanchin tlangpui sawina (review) a nei a. Zirlai naupangte leh sawm bik mi pawimawh te an tel a ni.

M Kikon hi BJP national Spokesperson niin, Nagaland-ah MLA niin, Nagaland sawrkar Adviser a ni bawk. Politician, poet, leh author a ni a. Nagaland-a Wokha district chhunga 40 Bhandari Constituency atangin MLA atan thlan tlin a ni a. Nagaland Legislative Assembly member a ni mek a ni.