THLEMNA TAWH HI THILSUAL A NI LO

_I Nundan Thlirlet La_

Rick Warren

Jan 30, 2024

"Chutichuan, zahngaihna kan hmuh theihna tur leh, puih kan ngaih huna tanpuina khawngaihna kan hmuh theihna turin, khawngaihna lalthutphah chu huai takin i hnaih ang u.” Hebrai 4:16

He kan chenna kehchhe karah hian thlemna tawk miah lo chuan a thanlen theih loh. Nimahsela hriatreng atana tha chu thlemna tawh hi sual a ni lo. Thlemnaa inbarhluihtir chu sual a ni thung. Thlemna i tawh avang khan kristian thalo tak i ni tihna a ni lo. Mihring i ni miau va!

Setanan i suangtuahnaa a rawn thlem che hi nangma tihsual a ni hran lo. Nimahsela i tipuitling a nih erawh chuan nangman mawh i phur thung. I ngaihtuahnaa cheng reng lo turin duhthlanna i nei. I ngaihtuahna thlak danglam la! Thil dang ngaihtuah zawk rawh. Thlemna chu a taka i puitlin loh chuan sualah i awm lo tihna a ni ang.   

Martin Luther chuan, “I lu chunga sava thlawk chu i dang thei lo va, nimahse i sam a bu a chhep tur chu i dang thei,” a ti. Ngaihtuahna tha lo tak i pu a nih pawhin, tihlawhtling turin hma la suh. Nangmah leh nangmah inhnehtir suh. Chu chu Setana duhzawng a ni, a chhan chu i inhneh apiangin ngaihtuahna tha lo tak tak te puttir chein, sualah a hruai lut thei che a ni. Ngaihtuahna chu thlemna chauh a la ni. Sualah i chantir leh chantir loh chu i duhthlanna a ni e. 

I damchhungin thlemna i tawk ang. Kum upa ber leh khawvela Kristian putling tak tak te pawhin thlemna an la tawk fo. Kristian puitling te chuan Pathian an hnaih poh leh, Setana beihna an tawk nasa, a chhan chu engtin emaw tala Setanan beihthluk a tum vang a ni. Nimahsela Pathian i hnaih poh leh, Setana beihna leh thlemna hmachhawn turin i inbuatsaih tha sauh sauh tihna a ni ang. 

Setana chu inhnehtir suh la. Kristian i nih angin Thlarau Thianghlim thiltihtheihna i nei a ni. Thudik tan turin Pathian Thu pek i ni. I mangan thu thlenna tur Isua i nei. Thlemna tuar chhuak tura i mamawh zawng zawng chu i nei a ni.  

Ngaihtuah zui atan

* I suangtuahnaa ngamthlemna te chu eng Pathian Thu ngaihtuahnain nge i thlak ang? 

* Thlemna i tawhin Thlarau Thianghlimin engtin nge a puih che?

* Vawiin hian Pathian hnena inhlan turin eng thlemna nge i kalsan ngai le?

*[Lettu: Sangpuia]*