Thingsai khuain Saikhawpui Kût ropui takin hmang

Thingsai | January 5, 2024: Thingsai khua chuan vawiin January ni 5 hian Government High School tual, Thingsaiah Saikhawpui Kut’ ropui takin an hmang. Saikhawpui Kut hi khaw dangin Haw Runpui an tih ang kha a ni a. Kut thupui atan hian – ‘Zirna leh Taimakna’ tih hman niin, Thingsai chhuak Pu P. Rohmingthanga IAS Rtd. fapa Justice Michael Zothankhuma, Gauhati High Court chu Kut pa niin, Khuallian pathum awmin, Thingsai khaw chhuak vek - Pi Vanlaldiki Sailo, Commissioner, Persons with Disabilities (PwD); Pu Liankima Lailung, Chairman, Mizoram Pollution Control Board leh Er. Lalrinkima Hnamte, Engineer in Chief, PWD te an ni.

Vawiina Kut hmannaah hian Thingsai khawchhuak mi hmingṭha 11 te hnenah ‘Saitlang Rohlu Chawimawina’ thuziak hlan an ni. Chungte chu- Pu P. Rohmingthanga IAS Rtd; Pu K. Thanfianga, Ex-Deputy Speaker; Pu K. Pakunga, Thingsai Historian; Pu P. Lianchhuma IPS Rtd; Pu M. Tumsanga IPS Rtd; Pu P. Lalbiaka, Ex-Minister; Evan K. Lianthanga, Environmentalist; Pu F. Vanlalnghaka, Ex-Minister; Pi Lalsangzuali Sailo, Padmashree Awardee; Pu F. Hranghlira, MPS; Pu Zira Hnamte, zai leh hla phuahthiam te an ni.

Saikhawpui kut hmang tur hian Mizoram chhung leh ram pawn aṭangin mikhual 500 vel an kal khawm a ni. Kut pual hian Saitlang Romualah Lungphun a ni a, He lungphun hi Pi K. Lalrengpuii, Treasurer, TWC Aizawl chuan a duh apiangte tlawh leh thlalakpui theih turin a hawng a ni.

Saikhawpui kut hi January ni 4 zan khan Thingsai Lal ‘Lalbuana Zan’ hman a ni a, Pu Lalbuana’n zirna kawnga a hmalakna kawng hrang hrang te Pu F. Lalzawmliana, Pu Lalbuana tupa chuan a sawilang a. Vawiin January ni 5 chawhma hian ‘Pu Lena Hun’ hman a ni. Pu Selthuama, Pu Lena tia hriatlar hi Thingsaia Middle English School Headmaster hmasa ber niin, a fate chu Pu P. Rohmingthanga, IAS, Pu P. Lianchhuma, IPS, Pu P. Lalbiaka ex-Minister te an ni a. Thingsai tana zirna leh rimawi lama Pu Lena sulhnu leh kutchhuak ngaihnawm tak Pu F. Aihnuna ziak chhiarchhuah niin School naupang ten hnam lam hmuhnawm tak an entir bawk.

Pu Selthuama tupa Kutpa ni bawk Justice Michael Zothankhuma chuan thu sawiin Mizoram pum huap pawha High School ding hmasa 4-na ni thei Thingsai khuaah hian mi thiam tam tak Mizoram pum huap ang pawhin an lo chhuak tawh a, an lo chhuah zel pawh a rinawm a. Thangthar ten kan rual-ute hnung kan zui theihna tur chuan mahni hriselna ngaih pawimawh hmasaka, taksa sawizawi that a pawimawh, lehkhabu tha a tam thei ang ber chhiar leh dik leh rinawm taka nun hman tur a ni a ti. Pu Michaela chuan tunlai hian lehkhathiam zingah taima lo leh chhhawr tlak loh an awm tan tih a sawi a. Thingsai thalaite chu zirna kawnga tan la zual turte, taimakna leh thiamna kal kawppui thei tura inbuatsaih theuh turin a fuih a. Mizo tawng tha taka thiam a pawimawi rualin saptawng emaw vai tawng emaw thiam tel a pawimawh tak zet a, hmasawn nan tawng thiam tam a pawimawh tih asawi.

Saikhawpui Kut lawm nan hian vawiin tlai lamah F. Hranghlira Memorial Ground-ah vantlang Ruai theh tur a ni a. Vawk 5 leh Bawng 2 talh niin mi 3000 ei tur ruai buatsaih a ni.

Saikhawpui kut hi zanin hi a tiak dawn a, a hmun ngai High School tualzawlah Zirtirtu Chalbuanga Zan hman tur niin Pi Vanlaldiki Sailo, Commissioner- Persons with Disablities (PwD) chu Khuallian a ni ang. Pu Hmingthansanga’n (Matea) Thingsai zirnaa Pu Chalbuanga Sulhnu tih a sawi ve thung dawn a ni.