Reiek khawchhuak mi hmingṭhate chawimawina lungdawh hawng

Aizawl | Jan 13, 2024: Vawiin January ni 13, 2024 (Inrinni) khan Pu K Vanlalvena MP (RS) LADS : 2021-2023 fund Rs.1250000/- (cheng nuai sawm pahnih leh singnga) hmangin Reiek Tlang Lungdawhah India leh Zoram khawvela Reiek khaw mi hming thate chawimawina lung phun a ni a. IAS, IFS, MCS, Professor, Poltician, writer leh hlaphuah thiam leh zaithiamte bakah a dangte Reiek khaw chhuak Mizorama mi langsar mi 31-te chawimawina lung an phun a. He hna hi YMA Reiek Branch-ten an thawk a ni. He hunah hian mi engemaw zat chatuan ram pan tate an awmin, an chhung leh khatten an rawn tawiawm a ni.

He hun hawngtu Pu K.Vanlalvena, MP (RS) chuan Reitlang lungduh siam a nih theihna tur hian Reiek khaw chhuak politician ropui Pu Lalthlengliana Ex- MLA, Vice President, MNF leh Reiek khawtlangte thawhrimna zarah tihhlawhtlin a ni a. Kei ai mahin Pu Thlenga hi he hun tihlawtling tura tha thawhtuah chawimawi tlak a niin ka hria. In lungphunte hi Lung tak tak, Bristist kut chhuak ni awm taka tha leh mawi a niin, nakin zela mi dangte tana entawntlak a ni zel dawn a ni. Reiek hi IAS, MCS, Professor, hla phuah thiam leh zaithiam tak tak, Zoram tana mi hlu tak tak heti zat an lo chhuak hi ropui ka ti a. Vawiinah ka lo ngaihsan thin Pu Lalthara IAS, ngeiin ka thusawi a ngaithla hi hlu ka ti a, India ramah nu pakhat hrin IAS pathum hi an la awm ve lo, heng zawng zawngte hi Pathian malsawmna a ni. Heng lungphun hian Reiek khua zirlai ni mekte thinlung chawh chhuah nan leh siam thar nan hmang se ka duh a ni a ti.

Chawimawite zinga tel ve, Pu Lalthlengliana Ex-MLA, Vice President MNF pawhin, Reiek hi Indopui laia Captain 3 ngawt nei thei awm chhun kan ni a, IAS pali ngawt kan nei bawk. Khawvelah chhul khat chhuak IAS pathum nei thei awm chhun kan ni. Reiek khua hi khaw ropui tak kan ni a, ka chhuang a, kan Lalropui takte khan Bristist awm hmain, reserve ram tha tak an lo ruahman vek a ni. Nakin zelah thangthar-ten Reiek chhuak mi ropui tak takte hi an hre lo mai ang tih ka hlau a, heng avanga ruahmanna siam kan ni a. Tuna kan zirlaite hian Mizoram tana ban pui pakhat ni thei theuh tura tan lak nan an hman ka duh hle a ni. Reiek Zokhua pawh hi kan hun lai khan Assembly House-ah ka au chhuahpui avanga siam kan ni a. Tun hmaa Reiek kawng chhe lutuk ni thin pawh kan hun laia kan siam a ni tih in la hre theuhvin ka ring a. Vawiinah ka chah duh che u chu, kan IAS, MCS leh a ti thei a piangin Reiek tan enge ka tih theih ang tih ngaihtuahna hmang vek turin ka chah duh che u a ni. IAS pawh tuna mi bak kan nei tawh lo ang tih ka hlau a, tan lo la thar zel ang che u, a ti.

He hunah hian Pu Lalthara IAS, Pi C.Laltleipuii MCS leh mi thenkhatin thusawina hun an hmang bawk a ni.

He hun hi Reiek Branch YMA President Pu lalduhzuala chuan kaihruaiin, Pu C.Lalawmpuia, Vice President, Reiek Branch YMA chuan hunserh a hmang a. Reiek Branch YMA zaipawl ten hla an rem bawk a ni.