Rajya Sabha MP K Vena'n chhim lam Myanmar ramri khuate tlawh

Aizawl | January 29, 2024: Mizoram MP Pu K.Vanlalvena chuan kar kal ta Nilaini atanga Inrinni thleng khan zan thum riakin Mizoram chhim lama Myanmar ramri dep khaw thenkhatte a tlawh a. Mara District leh Lai District a Model village pahnih Phura leh Pang khua te a tlawh nghal bawk.

Pu Vena chuan Mizoram chhim tawpa Myanmar refugee hruaitute Chapui khuaah tlawhin an dinhmun te a enfiah a. Khawchhung mite nena an inkarah harsatna awm thei chi hrang hrangte a sawipui bakah raltlan naupangte sikul zirtirtu hlawh a tum pui tur thu a hrilh a. Hmangaih taka lo tuamhlawmtu Mizoram mipuite laka that chhuah let ve chu raltlante tih makmawh a nih thu a sawi bawk.

Phura khawtlang tih hmasawn dan tur hrang hrang te khawtlang hruaitute a sawipui bakah, Pang khua chu international trade route pawimawh tak la ni tur a nih avangin motor kawng sialna tura compensation avanga harsatna awm thinte tih kian a pawimawh thute a sawi pui bawk.

Pu K.Vena chuan Myanmar ramri khaw engemaw zat tlawhin Indo-Myanmar ramri hung tumna awm mekin a nghawng theih tur te zir chiang pahin ramri depa awm mipuite ngaihdan a zawt pah bawk a. Myanmar nena Mizoram inkar ramri thui tak hi Tiau lui leh Chhimtuipui lui te a nih avang leh heng luite hi pi leh pu atanga an lui ramvahna an nih avangin, heng lui pahnih te ramri hung pawna dah hi pawm theih a nih loh tur thute Pu Vena hnenah an lo thlen hlawm a. Sawrkar laipui hotute hnenah thlen ngei a tum Pu K.Vanlalvena chuan a hrilh a ni.

Pu Vena hi Tuipang SDO Civil Pi R.Lalnunkimin a tawiawm a ni.