PAMRA-in Mizoram chhunga Chakma hel training a ngaimawh; an thiam anga hma lak an tum!

Aizawl | Jan 24, 2024: Peace Accord MNF Returnees Association (PAMRA) chuan Mizoram chhunga Chakma hel training an ngaimawh. Mizoram Sorkar chu heng hel pawl Training Centre hi titawp nghal tur leh Mizoram chhung aṭanga hnawtbo nghal turin an ngen a, an titawp a an hnawtbo lo a nih chuan an thiam dan berin hma lak an tum!

PAMRA Gen.Hqrs.Aizawl chuan thuchhuah siamin, "Parbatya chattagram Jana Samhati Samiti (PCJSS) Bangladesh Chittagong Hill Tracts-a Chakma hel pawl hote chuan tunah hian Mizoram chhung Lunglei District-ah leh Mamit District chhungah Military Training an nei mek a ni tih PAMRA chuan a hria a. He hel pawl hi JSS (Santu Group) an inti bawk a ni," an ti.

PAMRA thuchhuahin a tarlan danin, heng helte hi Lunglei district-a Salmore, Tara Banya, Chumochumi, Malchari (family quarters of the JSS Shanti Bahini cadres), Bhalukkyachari leh Andar Manek Village ah te an training a.

Hemi bakah hian Mamit district chhunga Silsury village (Company commander Alo Chakma) leh Amchari (Commander Binanda Chakma) ah te an training a ni.

PAMRA chuan, Hetiang a hel pawl ten Mizoram chhung ngeia Military Training an nei hi Mizoram tan thil ṭha lo tak anih avangin a ngai thutak hle a ni. "Kan Ram leh Hnam tan thil pawi tak thlen thei anih avang leh, Mipuite tan pawh a himlo in a ralmuanglo hle a ni." an ti a.

"Mizoram Sorkar hian heng hel pawl Training Centre hi titawp nghal tur leh Mizoram chhung aṭanga hnawtbo nghal turin kan ngen a, an titawp a an hnawtbo lo a nih chuan PAMRA chuan a thiam dan berin hma a la ang." an ti.

"kan Ram kan Hnam kan Sakhua himna turah chuan eng thil pawh kan do zel dawn a ni." tiin an thuchhuah chuan a tarlang a ni.