Central YMA in Manipur Zohnahthlak a mamawhte tan Manipur Group YMA kutah thawmhnaw lum leh mutbu thawn

Aizawl | Jan 13, 2024: Manipur tualchhung buaina avanga kawng hrang hranga harsatna tawk mek Manipura Zohnahthlak awmten thlasik khawvawt an tawrh mek a tih ziaawm theih beiseiin Central YMA chuan tukin, Ni 13, January 2024 zing khan Truck lian chi Pathum (3) in Lamka a Manipur Group YMA hruaituten a mamawhtute hnena an sem darh turin an thawn chho.

Tukin lama Lamka, Manipur-a mutbu lum leh thawmhnaw lum lam an thawn chhohte hi Central YMA ngenna anga Aizawl khawpui chhunga YMA Branch 30 ten an mahni Branch huam chhunga theuha an khawn khawm, Central YMA office-a an theh khawmte a ni a. Rizai leh Blanket tha tak takte leh kawrlum leh Jacket la hak tlak tak takte a ni hlawm a ni. Nizan lam khan Central YMA hruaitute bakah Tuikhuahtlang Branch, Khatla Branch leh Tuikual North Branch YMA ten thuamhnawte hi truck-ah hnatlangin an load a, member engemawzat an thawk chuak a ni.

Central YMA chuan thawmhnaw thawn chhoh nan hian ₹ 2,10,000/- (Nuaih hnih sing khat) lai a seng bawk.