Silk pangang vulhtute tan training buatsaih

Aizawl | December 6, 2023: Silk Samagra-2 Project hnuaia Farmers Training Serchhip Hmar veng YMA Hall a District Sericulture Office leh Research Extension Centre, CSB, Aizawl buatsaih chu Pu V. Zothansanga, Director, Sericulture Department chuan a hawng.

Director chuan thusawiin, eng kawng pawh nise theihna leh thiamna a in ang lova, thiam vek leh hre vek a awm theih bawk lo va, chuvang chuan intathriam a, hmasawn zel turin training neih hi a pawimawh em em a ni, a ti a. District Office in training a buatsaih chu lawmawm tiin Silk pangang vulhtuten hlawk zawka an thar chhuah theih nan mithiam zawkte zirtirna an dawn hian nasa taka a puih ngei a beisei thu a sawi a ni. Thil hautak leh harsa tak zir tur a awm dawn lova, uluk taka zirtirna ngaithla a, hlawk taka hmang turin Pu V. Zothansanga chuan kalkhawmte duhsakna a hlan a ni.

Training hi hun hnihah then niin hun hmasa zawkah Pu B. Lalchhuana, Deputy Director & Project Co-ordinator chuan Project (Purpose, action, goals) tih thupui hmanga zirtirna pe in, Pu Lalthlamuana Pachuau, Sericulture Scientist chuan Pruning Schedule and quality cocoon production tih hmangin a zirtir a. Hun hnihna ah Pi Janet V Sailo leh Pi Remlalliani Zadeng, DSO ten zirtirna an pe bawk a ni.

Programme hi Pu C. Liannghinglova, Sericulture Demonstator chuan a kaihruai a. Baktawng, Bungtlang, Chhiahtlang, Hualtu leh Serchhip a farmer te an tel a. Pu Lawmsanga Fanai, Sericulture Inspector chuan lawmthu sawiin hun a khar a ni.