Central YMA President in Manipura Zofa unaute tanpuina tur vai liam

Aizawl | Dec 9, 2023: Vawiin ni 9.12.2023(Zirtawpni) zing khan Manipur tualchhung buaina avanga harsatna tawk Zohnahthlak Relief Camp- a awm mekte tanpuina turin CYMA chuan Buhfai Bag 100 leh thawmhnaw lum engemawzat leh mutbu te a thawn a. Heng tanpuina te hi Central YMA President Pu Lalhmachhuana chuan CYMA Office Tuikhuahtlang atangin a vailiam.

CYMA Office tual a hun tawite hman na ah Central YMA President chuan thusawiin Zofate inpui leh kan Jerusalem chu Mizoram hi ani a a chhunga cheng Mizoram mipui te hian hmun hrang hrang a kan unau Zofate harsatna tawh hi kan hrereng a kan theih ang angin kan tuamhlawm zel dawn a ni a ti. Zofate hian harsatna kan tawh te hi a tha zawnga inpumkhat zual nan kan hman a tul thu a sawi bawk He hun ah hian Central YMA OB te leh CEC te an tel a. CYMA Vice President Prof. Lalnuntluanga’n Tawngtaiin a kal turte Pathian hnenah hlanna a nei bawk

Myanmar, Manipur leh Bangladesh tualchhung buaina avanga Zohnahthlak harsatna tawk mekte tanpuina tur hian hmun hrang hrang atangin CYMA ah tanpuina (Donation) hi a lut thin a, tun thlenga CYMA hnena tanpuina lut tawh hi cheng nuaih 236 chuang ni tawh in, heng atang hian cheng nuaih 167 chuang pekchhuah tawh a ni bawk.

Hmun hrang hrang atanga kan unaute tanpuina petu te chungah CYMA chuan lawmthu a sawi a. Tuhnaiah Mosia Agency, Aizawl te chuan tanpuina sum Rs. 2,30,000/- an pe bawk a, CYMA chuan thinlung takin lawmthu a sawi ani.