Aizawl-ah All India Bar Exam neih a ni ta!

Aizawl | Dec 10, 2023: Law zirlaite leh zir chhuakte nghahfak chu vawiin khan a takin a thleng ta a, a vawikhatna atan vawiin khan Aizawl-ah All India Bar Examination neih a ni ta!

Kum dangah chuan Mizorama LLB zir chhuakte hian Guwahati-ah Bar exam hi an hmachhawn ṭhin a ni.

Exam hi Govt Gorkha High School, Khatla-ah neih a ni a. LLB zo hlim, ukil hna practice tur te'n exam hi an hmachhawn a ni.

Vawiin-a Exam hmachhawnte hi mi 60 vel niin thu dawn a ni.

Aizawl-ah Bar exam a nih ve theih nan leh AIBE Centre Aizawla hawn a nih theih nan hian Govt Mizoram Law College hnuaia zirlai pawl Student Bar Council chuan hma a la ṭhin a, an hma laknaah hian Mizoram Law Minister kal chhuak TJ Lalnuntluanga chuan theihtawp chhuahpuiin, a hlawhtlinna an hmuh tirh khan SBC chuan lawmthu sawina thuchhuah an lo siam tawh a ni.

Kum tina neih ṭhin, All India Bar Examination hi Bar Council of India in Law Graduate, ukil hna chhunzawm tumte tana a buatsaih ṭhin a ni. He exam an paltlang hnu hi chuan Court-ah mi ai an practice ve thei tawh dawn a ni.

All India Bar Exam hmachhawn tur hian an awmna state bar associationah an inziah luh a ngai a, LLB an zawh ngei ngei a ngai bawk a, kumah erawh limit a awm lem lo.