Tata SK 612 LPS Pro Fight zan 28-na; Ṭum ruk champion thei NT Biakkima kan hmu!

Aizawl | November 12, 2023: Tata SK 612 LPS Pro Fight zan 28 chu nizan khan LPS Arena, Falkland Vengah khelh leh a ni a, bout li awmin, Pro Fight-a ṭum ruk champion thei hmasa ber NT Lalbiakkima kan hmu.

NT Biakkima vs Enkawla (L) | Photo: PC Lala

WELTERWEIGHT

Lalruatzela Hauzel (Mission Veng) bt Vanlalruatpuia (Saikhamakawn)

= Unanimous Decision (39-37, 39-37, 40-36)

* Kum 22 mi Ruatzela'n fimkhur taka inbeihnaah hnek chhuak tam zawk a nihna a hlawkpui. A pantu zawkah ṭangin a hnuai leh chunga a hnek zawnin awmzia a neih bakah round hnuhnung berah vawi thum hnek fuh zawnin a langsar zawk. Kum 19 mi Ruatpuia'n a hman thiam a vei lamin vai fuh chang nei mah se a bet zawkah a ṭang a, chak tur khawpin a bei let zo lo. Lawm luat avangin Ruatzela'n sawi tur a hre lo va, a vawi khat nan Pro Fight champion a nih rualin professional a khelh vawi thumna a ni a, a ṭum khat nan a chak.

LIGHTWEIGHT

HC Lalramfela (Chawngtlai) bt C Lalhruaitluanga (Cherhlun)

= Split Decision (37-38, 39-37, 39-37)

* Kum 28 mi Ramfela'n kum kal ta title fight-a a tlawmna chhang letin Hruaia lakah awlsam lo takin a chak a, kum riat hnuah a champion leh. 2015 khan bantamweight title a hnek chhuak a, a kum lehah a humhim zo lo. Light-ah insawnin 2022 title fight-ah Vanlalawmpuia a hneh lo va, kuminah hriam zawkin a kir leh tih a nemnghet a, a vawi hnih nan a champion rualin Pro Fight weight hrang pahniha champion thei zingah a tel nghal bawk. Round khatnaah chiang tak takin Chawngtlai boxer hian a hnek a, kum 21 mi Hruaia'n tawlh kual pahin a hnek let.

Round hnihna thlengin Ramfela'n panin a hnek ṭha viau a, Cherhlun tlangvalin round thumnaah a khelh dan tidanglamin a nawr let a, a hma aiin a chet dan a langsar. Hruaia'n a ngila vei leh ding a chhuah zawnin lehlam a tibuai a, round hnuhnung berah Ramfela a hnungtawlh hman a, a mitko kak bawihsawm a nih hnuah bei letin vawi thum chiang takin a vai fuh zawn a, Hruaia a tlu. Chawnghmingmuana'n chhiar a tum lai takin lawm em ema a zuanna lamah a tlu a, an tluk ve ve avangin referee-in a chhiar loh phah a, an inhnek tawn zui hle. Title Fight-a a inlan hmasak berah Hruaia'n champion kawnghren hnaih viau mah se a tir round hnihah a inveng nasa deuh a, an chan a chhiat phah. Ramfela'n a ṭum ruk nan professional huangah hnehna a chang a, vawi hnih a tlawm tawh a ni.

WBC INDIA SUPER LIGHTWEIGHT CHAMPIONSHIP

Gugan Kumar (Chennai) bt Vanlalawmpuia (Khuanthing)

= Technical Knockout (Round 2, 2:49 min)

* Pro Fight lightweight title kalsanin kum 26 mi Awpa'n WBC India super light title a chuh a, round hnihnaah technical knockout-in Chennai boxer Gugan a hneh. Khuangthing fighter hian a tir aṭangin hnek tluk a tum nghal a, feet 6-a sang Gugan invengin a tawlh kual a, a ban phak aṭangin a hnek let. Round hnihnaah hnek na leh ngampa zawk Awpa'n a ding lamin a hnek tlu a, a thawh leh hnuah umin a ding lamin a vai tlu leh a, second 11 a la awm tihin referee Ajay Salvi chuan a titawp. Awlsam takin Awpa a chak a, professional huanga vawi sarih a chakna niin knockout hmanga hnehna a chan ṭum ngana a ni a, Laldingliana leh F Zoramchhana'n zirtawpni zanah hlawhtlinna chang tawhin Mizo pathumin WBC India title an hnek chhuak.

FLYWEIGHT

NT Lalbiakkima (Siaha) bt Vanlalenkawltira (Champhai Dinthar)

= Split Decision (39-37, 39-37, 37-39)

* Biakkima'n rang taka a hnek zawn ṭhin chhawrin tunlaia hmasawn Enkawla lakah split decision-in a chak hram. Kum 27 mi Siaha fighter hian rahbi thar a tuk a, vawi nga champion HC Johnkenty Vanhlimpuia kalsanin Pro Fight chanchina ṭum ruk champion hmasa ber a ni a, a bitum zawng zawng a la hneh vek. Chutih laiin kum 20 mi Enkawla hmaah inhnek a thunun rei thei bik lo va, a tir lamah ṭha takin a nawr a, rang taka a vei a hnek chhuah leh lehlam taksaa a hneksak bakah a vai chhuah zawn ṭhin a langsar. Champhai Dinthar boxer-in ruahmanna a siam fuh tawk lo va, nawr let lovin a hnek let zauh zauh a, a hnek fuh langsar mah se a hnek chhuak tam tawk lo. Round linaah a nawr let thei tih lantirin dik leh dak ṭha takin a hnek fuh a, nalh takin a dawm a, mahse, a tlai hman tawh. Inhnaih chilhah Enkawla'n chiang taka vawi khat a hnek fuh laiin Biakkima'n rang tak leh lang tham mang lova vawi hnih thum a fuh hman chang a awm a, hnehna a sual chhuak hram. Professional boxing-a a chak vawi rukna a ni a, knockout ni lo point hmanga a chak hmasak ber a ni ve thung. Enkawla'n a chak loh dan pawm har a ti viau a, a lehpekah chak ngei turin a kir dawn tih a intiam. Professional a khelh ṭum hnihna ni nghalin a hmain a bitum nen an inhnehtawk a ni.

GIG Motors Fighter of the Night (Rs 3,000)

- NT Lalbiakkima (Siaha)

BEST BOXER (Ather Electric Scooter)

- Laldinsanga (Lunglei Ramthar, bantamweight champion)

KT ENTERPRISE PROMISING BOXER (trophy + Rs 10,000)

- Vanlalenkawltira (Champhai Dinthar, flyweight finalist)

KT ENTERPRISE BEST CHALLENGER (trophy + Rs 10,000)

- Ramdinthara (Pangzawl, bantamweight finalist)

KT ENTERPRISE BEST JUDGE (trophy + Rs 7,500)

- Lalmalsawma (Hnahthial)

KT ENTERPRISE BEST REFEREE (trophy + Rs 7,500)

- Lalchhanhima Hnamte (Armed Veng South)