Aizawl | Nov 4, 2023: MNF adviser Lalruatkima chuan, "Pi leh pute atanga kan ram chin hauh turin he nationalist sorkar hian theihtawp a chhuah a, a tul a nih chuan silai pawh a puak mai a ni." a ti.
He thu hi vawiin dar 2 khan Aizawl Press Club-ah sawiin, "Nationalist sorkar hian Zofa hmun hrang hranga mite tan pa chan a chang a. Myanmar, Bangladesh leh Manipur Zofate’n harsatna tawkin Mizoram an rawn pan a. India sorkar-in rem a ti lo chungin kan tuamhlawm a, ei leh in silh leh fen tur kan ngaihtuahsak a. Hmun hrang hranga Zo hnahthlakte insuihkhawm zel nan leh nationalism lama hma kan sawn zel nan MNF hi a sorkar leh a ngai tih chu nationalist-te ngaihdan a ni." a ti a
"Ramri chungchanga he sorkar chet dan pawh mipuiin an hria a. Kan hriat theuh angin hman ni lawk thleng kha chuan Vairengte police check gate thlang thlengin Assam Police an duty thin a, tunah chuan Vairengte police check gate thlang km 1 chuangah kan police-te an tawlh thla tawh a, a bul vel pawh kawng hrang hrangin kan chei a. Bairabi Zophai-a ram hauh nana MZP te'n chawlhbuk sak an tumna atanga Assam lam km 5 velah kan police te an awm tawh a, Thinghlun lamah pawh Assam-in an awp thin km 2 vel kan luah tawh. Pi leh pute atanga kan ram chin hauh turin he nationalist sorkar hian theihtawp a chhuah a, a tul a nih chuan silai pawh a puak mai a ni." a ti a ni.
Ads:
PRESS STATEMENT
_Lalruatkima
Chairman, MNF Publicity Board, MNF Gen. Hqrs.
@Aizawl Press Club On 4.11.2023
*Mizoram mipui zawng zawngte*
MNF Vote vek turin kan ngen
Kum 2023 MLA thlan chu November ni 7 hian neih a lo ni dawn ta a. Campaign vawrtawp kan thleng ta a, he inthlan lo awm turah hian MNF chuan hnehna chang ngei turin theihtawp a chhuah a, thahnem ngai takin kil tinah mite khawngaihna dilin kan fehchhuak a. Kan campaign thu leh hlaah te thahnem kan ngaih luat avanga mi pawi sawi palhte pawh kan lo nei a nih chuan thupha kan chawi a ni.
Pathian leh mipui duhsakna changin kum 2018 MLA Election-ah khan MNF chuan hnehna changin Sorkar kaihhruai hna kan thawk a, thahnemngai takin nationalism chawi vul a, hnam rilru pu chungin hna kan thawk a. Amaherawhchu, hna kan thawk tan deuh chiah tihah Covid 19 hripuiin khawvel a nuai a. Ram changkang zawkte pawhin tihngaihna an hriat loh hripui leng avangin Zoram pawh kan buai tak zet a nih kha. Dam khawchhuah tumin kan bei a, kum hnih chuang lai engmah ti mumal thei lovin kan awm a nih kha. Hetiang a nih avang hian kan sum hmuh tur tam tak kan hmuh loh phah a, Zoram kalsiam a tikhaihlak nasa hle a ni.
Ram mipui ten Sawrkar thar laka min beiseina leh keini ngei pawhin kan inbeiseina e’ngemaw zat tih hman loh leh tihhlawhtlin loh kan nei a. Mipui beisei ang kan phak lohna an hriatthiamna kan dil tak meuh meuh a. Hetih mek lai hian hnam thinlung pu chunga Development atchilhtu Chief Minister Pu Zoramthanga kaihhruaina hnuaiah hmasawnna hna theih tawp chhuahin he sorkar hian a thawk a, kum 2018 Election-a kan manifesto pawh za-a sawmriat (80%) vel lai kan tihlawhtling hman a. Tin, hmachhawp leh hmabak kan la ngah hle a ni.
Kum nga chhung hian ramin harsatna lian tak tak a tawk a, Covid-19 vanga kan buai bakah vawkhri (ASF) leh lirnghing te'n a rualin min tibuai a, ramin sum lama harsatna lian tak a tawh laiin ramri chungchangah kan buai a, kil hrang hrang atangin kan unaute an rawn raltlan bawk a. Hetiang hunah hian tute pawh sorkar se rit an ti ngawt ang. Kan chief minister pawhin Assembly House-ah a phur rihzia a sawi hial a, mahse a kaihhruaina hnuaiah "Pathian leh kan ram tan" tiin he sorkar hian theihtawp a chhuah a, heng harsatna hautak takte ramin a hmachhawn laia mipuite thlawpnaah MNF party chuan lawmthu a sawi a ni.
Kan sorkar tirh phatah mi tam tak nunna suattu zu zawrh kan titawp nghal a, Mizo nunphung milin sikul kal hun kan siam rem a, dan siamthat ngai tam tak siam thain dan thar thahnem tak kan siam a. Mizo thalaite’n hnam thinlung kan put thar leh theih nan zirlaibuah dah niin, Mizo hnam hla ‘Ro min rel sak ang che’ tih pawh zirna sikul tina sak turin kan ruahman a. Ei leh barah kan hnianghnar a, gas leh tui kan hnianghnar a, khaw siam that kawngah pawh hma kan la nasa hle a ni. Thlai leh thei tharchhuah a pung nasa a, chu chu bazar leh khawlaiah pawh hmuh theih a ni a, tomato phei chu kum hnih vel liam ta atang khan kan intodelh a, thil dang thenkhatah pawh intodelhna kawng kan zawh mek. Electric power lama hma kan sawnna pawh a ropui hle a, sorkar ding lai hian kawlphetha 20 MW lai siam theihna Vankal Solar Park a siam zo a, hei hi Mizoram chanchinah chhuan tham a tling. A hma khan Mizoramin kawlphetha hi 26.87 MW a siak chhuak a, hetah hian a tam ber chu MNF sorkar hmasa siam niin, Mizoramin kawlphetha a siam tam berna ni thin, 12 MW siakchhuah theihna Serlui B SHP pawh MNF sorkar kutchhuak a ni. Mipui hriselna lamah pawh theihtawp chhuah a ni a, Mizoram State Health Care Scheme hnuaiah mipuite a thlawnin an inenkawl thei bawk.
Nationalist sorkar hian Zofa hmun hrang hranga mite tan pa chan a chang a. Myanmar, Bangladesh leh Manipur Zofate’n harsatna tawkin Mizoram an rawn pan a. India sorkar-in rem a ti lo chungin kan tuamhlawm a, ei leh in silh leh fen tur kan ngaihtuahsak a. Hmun hrang hranga Zo hnahthlakte insuihkhawm zel nan leh nationalism lama hma kan sawn zel nan MNF hi a sorkar leh a ngai tih chu nationalist-te ngaihdan a ni. Ramri chungchanga he sorkar chet dan pawh mipuiin an hria a. Kan hriat theuh angin hman ni lawk thleng kha chuan Vairengte police check gate thlang thlengin Assam Police an duty thin a, tunah chuan Vairengte police check gate thlang km 1 chuangah kan police-te an tawlh thla tawh a, a bul vel pawh kawng hrang hrangin kan chei a. Bairabi Zophai-a ram hauh nana MZP te'n chawlhbuk sak an tumna atanga Assam lam km 5 velah kan police te an awm tawh a, Thinghlun lamah pawh Assam-in an awp thin km 2 vel kan luah tawh. Pi leh pute atanga kan ram chin hauh turin he nationalist sorkar hian theihtawp a chhuah a, a tul a nih chuan silai pawh a puak mai a ni.
Hrileng avanga sum harsatna avangin duhthusamin kalpui thei lo mah ila, kuthnathawktute leh miharsa zawkte dam kan nan SEDP kan pe a. Pathian leh mipui duhsakna changa kan sorkar leh chuan kan sem zui zel dawn bawk a ni.
Heng hmasawnna leh mipui hnen thlang phak hmasawnna zawng zawngte hi Pathian khawngaihna avanga chauha thawk thei kan nih kan hria a, Pathian chungah kan lawm tak zet a ni.
Hnam thinlung puchunga hmasawnna hna thawk chhunzawm a, hmabak tam tak kan la neihte thawhzawm min phalsak turin Zoram mipuite khawngaihna kan dil a. Pathian leh kan ram tana thawh chhuzawmna hun min siamsak turin kan ngen a. Bial hrang hranga MNF Candidate zawng zawngte lo vote vek turin MNF chuan thinlung takin Mizoram mipui zawng zawng kan ngen tak meuh a ni.
MNF chhinchhiahna chu ARSI a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: