NGOCC hotute'n ECI an hmu; Vote chhiar hun sawn turin ngen

Aizawl | November 28, 2023: Vawiin ni 28.11.2023(Thawhlehni) tlai dar 3:00 khan NGO Coordination Committee hruaitute chuan Mizoram Assembly Election Inthlan Vote chhiar hun sawn chungchangah Chief Election Commissioner (CEC) leh a thawhpui Election Commissioner te an hmu a. An inkawmnaah hian Sr. Deputy Election Commissioner leh Deputy Election Commissioner te an tel bawk.

NGOCC hruaitute hian Mizoram Inthlan Vote chhiar hun December 3,2023 chu Pathianni a nih avangin a hun sawn turin an ngen a, inkawmhona hun tha tak an nei.

Chief Election Commissioner chuan NGOCC duhdan leh ngenna te chu inkawmhonaah hian Election Commissioner pakhat a tel loh avangin member kima an sawiho vat tur thu a sawi.

NGOCC hruaitute hian beiseina sang tak an nei. Inthlan vote chhiar hun sawn chungchangah leh ECI hotute hmuh chungchangah hian Mizoram mipuite, Kohhran hrang hrang leh Political Party te tanrualna te avangin NGOCC chuan lawmthu a sawi tak meuh meuh a ni.

ECI hotute hmuhnaah hian hengte hi an tel ;

1. Mr Lalhmachhuana, Chairman, NGO Coordination Committee ( & President, Central YMA)

2. Prof. Malsawmliana, Secretary, NGO Coordination Committee (General Secretary, Central YMA)

3. Mr Lalbiakmawia Khiangte, Vice President, MUP

4. Mr H. Lalthianghlima, President, MZP

5. Mr Lalrampana, Finance Secretary, MSU