NESO bultumin Manipura remna leh muanna awm phutin pungkhawm

Aizawl | November 9, 2023: NESO bultumin vawiin chun khan Vanapa Hall kawtah Manipura remna leh muanna awm nan pungkhawm.

Vawiin ni 9th November, 2023 (Ningani) chhun dar 12 hian North East Students’ Organisation (NESO) Executive Council Meeting in a lo rel tawh angin, “Demonstration for Peace and Permanent Solution in Manipur” tih thupui hmangin Vanapa Hall kawtah Sit-in demonstration neih a ni.

He hun hi Mizo Zirlai Pawl (MZP) General Headquarters, Aizawl buatsaih niin, MZP Voce President C Lalremruata'n a kaihruai.

He hunah hian MZP President Pu H.Lalthianghlima chuan thu sawiin, "Manipur tualchhung buaina hian vawiin thlengin ziaawm lam ala pan thei lo chu pawi kan ti takzet a. Buaina chinfel thuai a nih theih nan sawrkar laipuiin hmala se kan duh a, ral thlir mai mai lo turin kan phut a ni” a ti.

MZP President chuan, “He buaina chinfel anih theih nan India hotu lu Prime Minister ngei pawh hi a hmunah kalin hma la se kan duh a, Mizoram Sorkar thar kan neih veleh kan Chief Minister thar hian rang takin hma la se, a hmun pawh tlawh ngei se kan duh a ni” a ti bawk.

NESO Vice Chairman Ricky Lalbiakmawia chuan, “Manipur buaina hian a daih rei ta hle a, Central Sawrkar-in chinfel tum lova a thlir liam mai mai hi NESO-in kan dem takzet a. Tan bik neia an hmalakna titawp turin leh buaina tireh thuai tura kan duh avangin vawiinah hian kan pungkhawm a ni” a ti.

North East Students Organisation (NESO) chuan, Manipur buaina chinfel thuai phutin vawiin ni 9 November, 2023 hian North East state capital tinah “Demonstration for Peace and Permanent Solution in Manipur” tih thupui hmangin hun a hmang a a ni.

NESO-ah hian zirlai pawl pariat; Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) and All Arunachal Pradesh Students’ Union (AAPSU) te a awm a ni.