MKHC leh pawl hrang hrangin CEO-ah vote chhiar hun sawn turin ngen nawn

Aizawl | November 9, 2023: MKHC leh pawl hrang hrang hruaitute'n vawiin khan Mizoram CEO-ah vote chhiar hun sawn turin ngen nawn.

Mizoram Kohhran Hruaitute Committee (MKHC), Party hrang hrang aiawh, MPF leh CYMA aiawhte chuan vawiin chawhma dar 11 khan Mizoram Chief Electoral Officer (CEO) Madhup Vyas hnenah vote chhiar hun sawn turin an ngen nawn.

MLA inthlan 2023 Vote hi December 3, 2023 Pathianni hian chhiar tura ruahman a ni a, hei hi Pathianni a nih avangin a tuk Thawhṭanni emaw Thawhlehniah sawn turin an ngen a ni.

Vawiin chawhmaa an ngenaah hian CEO hnenah hian ṭawngka leh ziakin vote chhiar hun sawn turin an ngen nawn a, CEO chuan thuneitu sanga a lo thlen an tum thu dawn a ni.

MKHC Joint Secretary Lalnilawma Kawlni chuan, "MKHC ang chuan kan hmalak theih sang ber niah kan ngai" a ti a.

MKHC chuan ṭum thum ngenna an thehluh tawh thu sawiin, CEO in a lo chhanna chu a ngaihṭhat thlak thu a sawi bawk.

MKHC Joint Secretary chuan, hmalak zel dan turah chuan Party leh NGO kutah an innghat tawh niin a sawi.

CEO chuan, party hrang hrang aiawh kalkhawmte chu Election Commission Of India (ECI) ah vote chhiar hun sawn tura ngenna thehlut nawn turin a lo ngen a ni.