MZP in Scho pekchhuah phuta lungawi lohna titawp; naktuk aṭangin Scho sem dawn!

Aizawl | November 16, 2023: Mizo Zirlai Pawl (MZP) General Headquarters, Aizawl chuan Scholarship 2nd Installment pekchhuah phuta lungawi lohna lantir leh zanin atanga chaw ngheia lungawi lohna lantir chu thuneitute atanga thu lawmawm a dawn avangin zanin November 16, 2023 dar 8:30 atang khan a titawp a ni.

MZP President H Lalthianghlima chuan, "hunger strike kan neih mek hi tun dinhmunah chuan thu lawmawm kan hriat tak avangin leh scholarship sem theiha a awm tak avangin kan titawp ta a ni" a ti a. "Scholarship hi zirlaite account a a luh vek hma chuan MZP chuan kan enzui zel dawn a, a tawp thlengin zirlaiten an dawn kim chuan hma kan la zel dawn a ni" a ti a ni.

MZP chuan Scholarship 2nd installment pek phutin, Mizoram Scholarship Board office kawtah ni thum chhung lungawi lohna a lantir tawh a. Mizoram sawrkar leh Scholarship Board-in Election Model Code of Conduct rule hman a nih avangin sem theih a nih loh thu an sawi a. MZP chuan Election Commission of India (ECI) hnenah lehkha thawnin, a kaihhnawih thuneitute hrang hrangte a dawr kual bawk.

MZP hmalakna in awmzia a neih loh avangin, ni 16 November, 2023 tlai aṭang khan chaw ngheia lungawi lohna lantir tura rel a nih hnuah Election Commission of India (ECI) chuan Mizoram Scholarship 2nd Installment sem phalna a rawn pe ta a. Mizoram Scholarship Board (MSB) pawh Scholarship sem turin an inbuatsaih nghal tih finfiah a nih avangin, lungawi lohna lantir chu tihtawp nghal a ni.

MZP chuan lungawi lohna a lantir hi titawp mahse, zirlaite account-ah a luh vek hma chuan a enzui zel dawn a. Uluk takin a vil reng dawn a ni.

Scholarship pekchhuah a nih neih nana MZP hmalakna thlawp tlattu zirlai pawl hrang hrangte leh lungawi lohna lantirnaa thawkchhuak zirlai zawng zawngte chungah MZP chuan lawmthu a sawi a. Zirlaite'n kan dikna chanvo kan nawrchhuahna atana tha leh zung thawhtute hi MZP chuan a ngaihlu tak zet a ni.

Zirlaite scholarship sem a nih theih nana MZP hmalakna theihtawp chhuahpuitu, Mizoram Chief Minister Pu Zoramthanga leh Law Minister Pu TJ Lalnuntluanga te chungah MZP chuan lawmthu a sawi nghal a. MZP hmalakna avanga harsat leh buaina thlêng zawng zawngah MZP chuan mipuite hriatthiamna a ngen nghal bawk.