ISUAN A RIN CHE AVANGIN MI DANG PAWH RING VE RAWH

  _Pathianin Bahlahnate Dinchhuahlehnaa A Chantir Dan_

By Rick Warren 

— Nov 8, 2023

"Engkim a tuar hram hram a, engkim a ring a, engkim a beisei a, engkim a tuar chhuak thin." 1 Korinth 13:7

Isuan a ring che a. A ring che a ni tih a chianna Bible-ah tam tak a awm a ni.

“Tih tak meuhvin ka hrilh a che u, anṭam mu fangkhat ang rinna in neih chuan, he tlang hnenah hian, ‘Heta tangin sawtah sawn va insawn rawh,’ in ti ang a, a insawn mai ang; in tan tih theih loh reng engmah a awm lo vang,” a ti a. Matthaia 17:20

“Ringtu atan chuan engkim tih theih a ni asin.” Marka 9:23

“Rinna in neih a, in rinhlelh loh chuan … tlang hnenah pawh hian, ‘Lo insawn la, tuifinriatah lo inpaih rawh,” in tih ang chuan a lo awm ang.” Matthaia 21:21

Isuan rinna i neih phawt chuan thil ropui tak i ti thei a ti a, a Thlarau chu i chhungah a cheng a ni. Mi dang pawhin rinna an neih zel theih nan tanpui turin a duh che a ni. Tirhkoh Paula chuan fuihna thu sawiin, “Chu chu in rinna leh ka rinnain kan inthlamuan tawn theihna tur, ka tihna a ni,” a ti. Rom 1:12

Nitin mahni inringtawk lem lo te nen in indawr thin a. Mi tute pawh hian chak lohna lai an nei theuh va. Mi tam tak chuan hmana miten engmah a nih loh tur thu an sawi a khan an hrechhuak leh ziah a.

Chu anchhia chu engtin nge a letling zawngin an thlentir theih ang? Mi dang thusawi ai chuan Isua thusawi ring zawk se la, tichuan an ti thei ang tiin i pui thei a ni.

Bible-in 1 Korinth 13:7 ah, Hmangaihna chuan, “Engkim a tuar hram hram a, engkim a ring a, engkim a beisei a, engkim a tuarchhuak thin,” a ti.

Chutiang tur chuan Pathianin a beisei che a ni. Pathianin a sawi te an hriat theih nan mi dang hnenah i rinna lanchhuahtir thin rawh.

Kohhrana bul tan dan tha ber chu pawl ho bik neih hi a ni. Hun harsa leh hrehawm tih chang pawh nei thin mah ila, nangmah fuih thara, chakna thar pe theitu tur che pawl ho i neih a ngai a ni. Chutiang chiah chuan mi dangin harsatna an tawh pawhin i pui ve thei ang. Isua zuitute chuan Krista chauh an ring lo va. Mi dangte nen pawh kan inring tawn a ni.  

Isuan a rin che anga mi dang i rin ve chuan i rinna chuan mi dang rinna pawh a ti thanglian thei ang.

Ngaihtuah zui atan

* Isuan a rin che anga nangmah i inrin theih lohna i chak lohna hrang hrang engte nge?

*Mi dang i ring a ni tih i lantirna turin engtin nge hma i lak ang?

* Kristan nangmaha theihna a hmuh chu i thlen theihna turin engtin nge i rinna i tihpun ang? Miin an rinna an tihpun theih nan engtin nge i puih ang?

[Lettu: Sangpuia]