BEIDAWN LOHNA CHHAN TUR KAWNG LI

_Hun Khirh Tak Kara Ke Pen Dan_

*BEIDAWN LOHNA CHHAN TUR KAWNG LI*

- Rick Warren

29 Nov 2023

"Thil hmuh theihte hi en lovin, thil hmuh theih lohte chu kan en zawk si a.” 2 Korinth 4:18‬

Thil thui tak thlir lo va - tuna i harsatna leh hrehawmna chauh i ngaihtuah chuan -  chu beidawn duhna thinlung pangngai a ni.

Nimahsela, chatuan thlirna atanga i thlir chuan, eng pawh thleng se la, hma lam panin i kal zel thei ang.

“Chu mi avang chuan kan dawl lo va, kan pawn lam mihring hi lo awngrawp telh telh mah sela, kan chhung lam mihring chu ni tin siam thar zelin a awm zawk a ni. Kan hrehawmna nep tak, tun mit khap kar chhung chauhva awm tur hian ropuina nasa tak chatuan atan min siamsak nasa tulh tulh a ni; thil hmuh theihte hi en lovin, thil hmuh theih lohte chu kan en zawk si a” 2 Korinth 4:16-18

He thu hian beidawng lo va kal zel thei turin kawng li min kawhhmuh a.

*Kan beidawn lohna chhan chu, “kan thlarau chu ni tin siam tharin a awm zel a.”* Kar khat chhung chaw ei lo va awm chu kan ngaihtuah ngai lo, nimahsela thenkhat chuan karkhat tal tap Bible keu miah lo vin kan awm thin. Chu chuan ka thlarau mamawh a phuhru lo thin khawp a ni! Ni tinin i thlarau siam thar i duh chuan, Pathian Thu lo bih thin rawh.

*Kan beidawn lohna chhan chu, “tuna hrehawmna te chu, tun mit khap kar chhung chauhva awm tur a ni.”* Harsatnate hi awm reng tur an ni lo va; kal liam tur an ni. Kan harsatna te pawh hi kan damchhung daih pawh ni se, vanrama kum tam tak hlim taka kan awm tur ngaihtuah chuan nep tak a ni. He leia harsatnate chu reilote atan a ni a, Pathian chuan kan tan ruahmanna rei tak daih tur a nei a ni. 

*Kan beidawn lohna chhan chu, “kan hrehawmna hian, ropuina nasa tak chatuan atan min siamsak a ni”* Pathianin kan nuna thil thlengte a hmang thin a - kan harsatna te pawh - chatuan atan min siamsak a ni. Rom 8:28 chuan, “Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria,” a ti a ni.

*Kan beidawn lohna chhan chu, “thil hmuh theih lohte kan en zawk vang a ni.”* Chatuan daih tur thil kan ngaihtuah chuan, intlansiakna pawh fel takin kan zo thei, a chhan chu hmathlir thui tak kan neih avangin. Kan rilru dahna chu chatuanah a ni.

A nih chuan, vawiin hian khawiah nge i rilru i pek? I harsatna ni lo vin, Isua en zawk rawh. Beidawng lo ang che! 

Ngaihtuah zui atan...

* Tuna i harsatna te kha vanrama i lawmna tur nen khaikhinin eng nge i rilrua a lan dan?

* Bible study piah lamah, eng te nge thlarau nun chatuan thleng daih tur chawm thei che?

* Hebrai 12:2 chhiar la. Isua hmaa hlimna awm harsatna pawh tuartir zel thei tu chu eng nge?

*[Lettu: Sangpuia]*