Aizawl | October 26, 2023: MNF GHQ General Secretary (Media & Publicity) VL Krosshnehzova chuan vawiin dar 2 khan Aizawl Press Club-ah thuthar thehdarhtute kawmin, "ZPM-in kuthnathawktute an bawl kual," a ti a, "an tih theih loh tur pawh mipui an tiam duh" a ti bawk.
VL Krosshnehzova chuan, "ZPM Chief Ministerial Candidate Pu Lalduhoma chuan, “ZPM a sorkar chuan kum 3 chhung sawhthing kan lei phawt ang,” (October ni 31, 2022 Vanglaini) a ti a. Hei lo pawh hi vawi tam tak sawhthing lei an tum thu hi an lo sawi tawh thin a. “ZPM chuan vote ni lovin thlai thar kan lei dawn,” tiin kuthnathawktute lung tileng thei tur ang berin an sawi thin a. Hma an han la chho ta a, ZPM Market Study Team-te insiamin sawhthing hralhna an zawng a, nasa takin an bei tih an Convener Dr KC Lalmalsawmzauva chuan Zonet-in an kawmnaah a sawi a. Sawhthing an khaikual fe hnuah sawhthing hralhna an hmuh zawh loh thu sawiin, Zonet-in an kawmnaah ZPM Market Study Team Convener Dr KC Lalmalsawmzauva chuan, “Sawhthing hralhna tun thleng chuan kan zawng hlawhchham,” a ti ta a ni." ati.
"Hetianga a hralhna an hmuh zawh tak si loh avang hian sawhthing hralhna chungchangah an beidawng a, Pu Lalduhoma chuan, “Sorkar tak takin lei kan tum lem lo,” tiin Dt. 23.10.2023 khan Zonet-in an kawmnaah a sawi leh ta si a ni." a ti a.
"Vawi tam tak sawhthing lei an tum thu ZPM hian an lo sawi tawh a, an tlin hma hauh a an boruak a tha nia an hriat atangin an thusawi an thlak leh tan ta mek e. Han sorkar ngat se chuan an intiamna ang an nih loh nasat tur zia hei hian a tarlang chiang hle. Vote an zawn mek lai pawha an thusawi sut leh zung zung duh Party leh Leader hi enchhin tlak an ni lo tih Zoram mipuite hian hre turin kan duh a ni. Vote an hmuh theihna tur a nih phawt chuan an tih theih loh tur tih an mahni ngeiin an hriat sa pawh sawi a, tiam mai zel duh ZPM Party hian an thil tih dan hi sim se kan duh hle. " tiin a sawi a.
"Kuthnathawktute beiseina dik lo pe lo turin MNF chuan ZPM Party thurawn kan pe a, an vote chiah an duh tih hi kuthnathawktute hian hria se kan duh bawk a ni. Nasa taka an thlai tharte hralhna tur ngaihtuah sak a, an leilet te cheibawl sak a, link road te laih sak mek a, SEDP nuai 3 hmanga khaichhuah tumtu MNF Party hi Party rintlak leh dik, thil tak tak ti thin a ni tih hria a, tun inthlanah pawh thlang tling leh ngei turin kan ngen a ni." tiin a sawi bawk.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
.
Post a Comment
He post chungchanga i ngaihdan lo sawi ve rawh: