SEDP kan pe chhunzawm dawn - MNF Sr Vice President Tawnluia

Aizawl | October 13, 2023: MNF Sr Vice President Tawnluia chuan nimin chhun dar 12 khan Hnam Runah Thutharthehdarhtute kawmin, SEDP kan pe chhunzawm dawn, a ti.

MNF Sr. VP chuan, "MNF Sorkar flagship programme Socio-Economic Development Programme (SEDP) chu a theih ang angin chhung tin (family oriented) thleng phakin pek chhuah tan chhoh a ni ta a. MNF sorkar-in inthlan dawna a intiam ang ngeia hetiang a ti thei hi a lawmawm tak zet a. Mi harsa zawk leh kuthnathawktute duhsakna lantirtu sorkar chungah MNF chuan lawmthu a sawi tak meuh a. SEDP dawngtu zawng zawngte'n hlawhtlin pui ngei se kan duh tak zet zet a ni." a ti.

 

"Mizoram sorkar chuan SEDP 1st Phase-ah chhungkaw 60000 hnenah Rs. 50000/- theuhin pek an ni tawh a. Hemi atan hian cheng vaibelchhe zathum (300 crore) senral a ni a. 2nd phase-ah chhungkaw 60000 hnenah vek Rs. 25000/- theuh pek leh niin cheng vaibelchhe za sawmnga (150 crore) senral a ni a. Tin, 3rd phase-ah chhungkaw 60000 tho target-in selection neih chhoh mek a ni a. Inthlanin min nang ta a ni.

Family oriented SEDP atan hian vaibelchhe zali leh sawmnga (450 crore) senral a ni tawh a ni. Sorkar hna vuan ve lo mipui nawlpui harsa zawkte ban phakah Mizoram Budget hnuhhniam a ni hi a lawmawm a, thenkhatin sawiselin demna thu aupui viau mahse, Mizoram budget, mipui hnen thlengpha a nih zia SEDP Family Oriented kalpui a ni hian a tarlang hle. Hei hian mipui banphak sawrkar kan neihzia pawh a tichiang hle a. Sawrkar atanga thlabi hlawh nei ve lo tan SEDP hi malsawmna a ni tak zet a ni.

SEDP pekchhuah chhungchangah hian tih fuh tawk lo deuh engemaw a awmpalh thei ang tih a rinawm a, SEDP dawn mamawh ngawih ngawih, la dawng lo emaw, dawng tur thlan tawh, list-a tel lo palh emaw pawh awm theih a ni. Hengte dawn theih tur hian kimchang leh changtlung zawka kalpui zel tum a ni.

MNF Sorkar tan tirh chhohah khan SEDP hi pilot project atan chhungkaw 2000 chuang hnenah pek a lo ni tawh a, chhungkaw khatin cheng nuai 3 chuang te an dawng hlawm a. Hripuiin min tihbuai tak avangin e’ngemaw chen family oriented SEDP pek hi a khaihlak ta a ni. 

SEDP Phase 1 hi installment hnih pek a ni tawh a, phase 2 hi installment khat pek a ni tawh a, 3rd phase hi selection neih niin inthlanin a nang ta rih a. MNF-in sorkar-na a chang leh a nih chuan SEDP hi pek zui zel a ni dawn a, chhungkaw khatin nuai 3 an dawn kim hma chu pek chhunzawm a ni ang a, a project a zirin nuai 3 chuang pawh an dawng thei dawn a ni. MNF sorkar chuan SEDP hmang hian kuthnathawktute leh miharsa zawkte leirem rah tir a, khaichhuah hi kan tum nghet tlat a ni.   

Covid hripui leng avangin vaibelchhe 3000 dawn lai kan sum hmuh tur kan hmu lo a, kan unau raltlan te avanga buaina, ramri buai, khawchhak lirnghing, vawkpul hri rapthlak tak, ram kang nasa leh buaina neuh neuh dangte kan ramin kan tawk a. Hun danga thleng ngai lo harsatna hrang hrang kan tawh avang hian kan tum lohna lamah sum hman a tul nasa hle a. Heti chunga mirethei leh kuthnathawktute dinchhuah ve-na tura SEDP pek a ni thei hi a lawmawm tak zet a ni."